2026 yılın kasım ayın 5-indä Kişinövda geçti REFLECT II halklararası üüredicilik proektinin sonuç konferențiyası - «Moldova Respublikasında kolegalar arasında profesional işbirlii sisteması yardımınnan kaliteli üürenmäk» (Quality Learning through Peer-to-Peer System in Moldova).
Bu toplantıda proektin gerçekleştirilmesinin sonuçları özetlendi, toplanmış deneyim paylaşıldı hem refleksiv yaklaşımın üüredicilik praktikasında ileridä kullanılmasının perspektivaları konuşuldu.
Konferențiyaya Komrat Devlet Universitetinin delegațiyası katıldı. Onun içindä universitet üüredicileri, pedagogika bölümündän bir studentka hem Gagauziya Avtonom Territorial Bölgesinin hem Tarakliya rayonunun Baş Üüretim İdarelerinin inspektorları vardı. Onnar REFLECT proektinin ideyalarının gerçekleştirilmesinä hem yayılmasına katıldılar.
Komrat Devlet Universiteti için REFLECT II proektinä katılmak universitetin, genel üüretim kuruluşlarının hem üüretim idarelerinin arasında profesional işbirliinin gelişmesindä önemli bir etap oldu. Proektin süresincä profesional refleksiya kulturasının oluşturulmasına, dersleri gözletmäk praktikasının ilerletilmesinä, yapıcı geri bağlantının gelişmesinä hem üüretim proțesinin katılımcıları arasında işbirliinin kuvetlendirilmesinä özel dikkat verildi.
Universitet temsilcilerinin hem inspektorların sonuç konferențiyasına katılması ortak işin sonuçlarını analiz etmää, Moldova Respublikasının başka üüretim kuruluşlarından kolegalarla deneyim paylaşmaa hem REFLECT metodologiyasının ileridä kullanılması için yönneri belirlemää imkan verdi.
Böölä toplantılara pedagogika bölümündä üürenän studentların katılması ayrı bir önem taşıêr. Profesional refleksiyaya, gözletmeyä hem pedagogika işinin analizınä çağdaş yaklaşımlarnan tanışmak gelecektäki üüredicilerdä araştırma bakışını, kendi işini analiz etmäk becerilerini hem devamlı profesional gelişmeyä hazırlıı ilerledêr.
Konferențiyanın baş temalarından biri proektin ikinci etapı bittiktän sora onun sonuçlarının devamlılıını saalamaktı. Katılımcılar profesional toplulukların ileridä geliştirilmesinin, gözletmäk hem refleksiya instrumentlarının sistematik kullanılmasının, toplanmış deneyimin üüredicilerin ilk hazırlıına hem devamlı profesional gelişmesinä katılmasının önemini belirttilär.
Komrat Devlet Universiteti için REFLECT II proektinin tamamlanması eni bir etapa geçmäk demektir: oluşmuş profesional praktikaları korumaa hem geliştirmää. Toplanmış deneyim universitetin, üüretim kuruluşlarının hem Gagauziya ile Tarakliyanın üüretim idarelerinin arasında işbirliini ileridä kuvetlendirmää temel hazırlêêr.
Komrat Devlet Universiteti organizatorlara, proektin partnerlerinä hem bütün katılımcılara verimli işbirlii, profesional dialog hem Moldova Respublikasında üüretimin kalitesini yükseltmeyä yönelmiş ortak iş için teşekkür edêr.
Publikațiya: Kurteva O.V., pedagogika bilimnerinin doktoru, universitet konferențiarı, proektin instituțional koordinatoru
