Noyabrinin (Kasım) 4-ündä 2022 y. Gagauz filologiyası hem istoriyası kafedrası  «Bizim yazıcılar – gagauz dilimizi yaşadannar» seminarı geçirdi.

Seminarın neetiydi – taa yakından tanışmaa gagauz peetçisinin yaratmalarınnan, açmaa kendinä avtorun incä patriotluk duygularını; seslemää avtorun çevirmä peetlerini hem tanışmaa redaktorluk işinnän. 

Seminara katıldılar gagauz filologiyası kafedrasından üüretmennär, gagauz grupalarında üürenän ham başaran studentlär, magistrantlar, bibliotekacılar, başka sesleyicilär.

Musaafir oldu PÖTR ÇEBOTAR – yazıcı, çevirici, aaraştırıcı (bu yıl tamannadı 65 yaşını). Toplantı çeketti kiyat sergisindän, angısını hazırladı universitet bibliotekası. Kısadan verildi bibliografiya haberleri: Kösä A.E. açıkladı statistika haberlerini, söledi, ani bibliotekada var eterli kiyat avtorun yaratmalarınnan, hepsi toplumnar hem basımnar, da onnarı hepsini studentlär üürenmäk proţesindä kullanȇrlar.

Ana dilindä peet tä yazmaa, başka dillerdän gagauz dilinä dä peet çevirmää ya da artık yazılı tekstlerä redakţiya yapmaa – mutlak lääzım gagauz dilini pek islää bilmää, duymaa onu da becermää peet formasına fikirlerini hem duygularını erleştirmää. O üzerä gagauz dilimiz yaşayacek okadar, nekadar gençlär ana dilini üürenecek da yazıda, artistika literaturasında kullanabilecek.