Gagauz filologiyası hem istoriya kafedrasından MPU-23 grupadan magistrantlar başardılar profesional praktikayı. Üürenmäk planına görä, onnar topladılar didaktika materiallarını, üüretim kurumundä geçirilmiş derslerin didaktika proektlerini, hazırladılar portofoli da yanvarın (büük ayın) 23-ündä 2025 y. korudular praktika hazırlıklarını. Profesional praktikayı korumak çevresindä, Evdokiya Dragni hem Mariya Kılçık magistratura studentleri olarak, bir enilik bu sıraya getirdilär: Komrattakı “Çöşmecik” 5-inci uşak başçasından hazırlık grupadan uşaklarınnan Komrat Devlet Universitetinä musaafirlää geldilär. Uşak başçasından terbiedicilär (Dragni E.V., Uzun A.S., Jeju A.S.), gagauz dili üüredicileri (Şlömskaya E.İ.), metodist (Kılçik M.G.) bir küçük konțert programasını uşaklarlan maasuz bu olay için hazırlamışlar. “Çöşmecik” 5-inci uşak başçasından çok speţialist üürendi Komrat Devlet Universitetindä, 4 kişi dä başardı gagauz dilindä üüretim programasını magistraturada. Millet rubasınnan giiyimni gözäl ușacıklar “Vatan” hem “Uşak başçası” türkülerini çaldılar, “Vatan” için söleyişleri annattılar, aralarında dialog kurdular, “Doktorda” rollu oyunu gösterdilär, meyvalan dolu sepetçiklärlän gagauz oyununu oynadılar. Komisiya hem siiredicilär gördü hem işitti, ani uşaklar gagauzça lafederlär, türkü çalȇrlar, serbest kendilerni tutȇrlar, havezlän sözleşmeyä hem dialoga katılȇrlar. Komrat Devlet Universitetindän bütün komisiya azaları (Galina Mutaf, İvanna Bankova, Güllü Karanfil, Natalia Duşkova), fakultet dekanı Kurteva Oxana, türk dili üüretmenneri, magistrantlar sıcak duygularlan uşakları karşıladılar, pek sevindilär, ani kızçaazlar hem çocucaklar gagauz dilindä gözäl lafederlär. Büüklär kutladılar uşakları, diledilär saalık, bol-bol baaşış verdilär. Uşaklar da sevindilär, çok mutlu kaldılar bu buluşmaktan, dolu üreklän hem ii keflän başçaya döndülär. Gagauz filologiyası hem istoriya kafedrasından pedagoglar teklif ettilär uşaklara hem terbiedicilerä ileri dooru da bölä gözäl gagauz dilindä lafetsinnär, dili ilerletsinnär. Butakım enilik praktikayı korumakta bir ii adet olur da praktikayı korumak proţesi taa şen, taa diri hem taa faydalı geçär.
Bankova İvanna doktor,
konferenţiar-universitar
