Oktäbrinin 29-unda 2025 y. Komrat Devlet Universitetindä gagauz filologiyası hem istoriya kafedrası «Gagauz dili hem kulturası» disţiplinasında XI-inci Olimpiadayı geçirdi, ani anılmış türkologun Pokrovskaya L. A. 100-üncü yıl dönümünä (1925-2009).
Olimpiadaya katıldılar Gagauziyanın liţeylerindän üürenicilär – 10-12-nci klaslar (2 kişi bir liţeydän). Onnar registraţiya yaptılar Komrat Devlet Universitetinin Moodle platformasında hem denemäk testini geçtilär. Registraţiya listesinä görä, Olimpiadaya yazıldı 11 liţey, 21 kişi,
da hepsi bütün programayı tamannadı.
İlk hem ikinci 45-är minutluk iş Moodle platformasında geçirildi. Bir kişi komandadan tamannadı bir test «Lüdmila Aleksandrovna Pokrovskaya», öbür kişi hep Moodle platformasında paralelca yazdı testi «Gagauzların ruh kulturası». Cuvaplardan belli oldu liţeyistlerin geniş bilgileri anılmış türkolog için hem ani üürenicilär hepsi islää biler gagauzların kulturasını, adetlerini, aylä paalılıklarını, kendi senselelerini.
Üçüncü denemäk – Pokrovskaya L. adınnan baalı bir kiyadı tanıtmak. İkişär kişilik komanda, 20-25 minut barabar hazırlanıp, 5-7 minudun içindä gagauz dilindä kiyada aazdan anotaţiya yaptı. Verilmiş shemaya görä gençlär secili kaynakların avtorunu, janrasını, içindekisini hem kendi komentariyalarını açıkladılar.
Hep bu gün, oktäbrinin 29-unda, gagauz dili üüredicilerindän kurulu maasuz komisiya (Rakovçena S. L., Arfanos V. A., Bankova İ. D., Güllü Karanfil, Mutaf G. N.) kazanılmış notaları toplayıp, çıkışları yaptı. Komisiya azaları hesap aldılar, ani liţeyistlerin çoyu gagauzça gözäl lafeder, diskusiyaya katılmaa becererlär hem kendi düşünmeklerini akıllı argumentleerlär. Herbir üürenicinin toplandıı ballarını saydıktan sora liţey komandaların bütünneşik balı toplandı, da kazanılmış erlär belli oldu. Sonuçları hem çıkışları cümneyä bildireriz:
I-inci eri kazandı Çeşmäküü liţeyin komandası – Sokolova Elena, 12 kl., Çolak Diana, 10 kl.;
II-nci eri kazandı M. Guboglu liţeyin komandası – Uzun Ani, 12 kl., Guboglo Yuliya, 11 kl.;
III-üncü eri kazandı V. Moşkov liţeyin komandası – Taşoglo Darya, 12 kl., Sobor Elena, 12 kl.
«Gagauz dili hem kulturası» disţiplinasında XI-inci Olimpiadaya hepsi katılannara jüri azaları verdilär baaşış – diplom, katılım sertifikatı, gagauz yazıcıların yaratmaları, annatma hem peet toplumnarı, «Guguşçuk» jurnalı, lingvistika terminneri sözlüü h.b.
Teklif ederiz hepsi liţeyistleri, gelän yıla XII-inci Olimpiadaya katılsınnar, ana dilindä lafetsinnär hem gagauz dilindä hem kulturasında bilgilerini denesinnär.
