Mardın 20-si KDUnin bibliotekasında geçti ‘Gagauzologiyanın eni tarafları’ adlı bir açık lekţiya. Lekţiyayı verdi istoriya bilimneri doktoru, habilitat, etnolog, kulturolog Elizaveta Kvilinkova.  

30 yıldır bilim aaraştırmaları yapan Kvilinkovanın 400-dän çok bilim aaraştırmaları vardır. Bibliotekanın fondunda Elizaveta Kvilinkovanın  15 monografiyası var. O kiyatlar KDUnun saytında elektron variantta da var.  

Bu lekţiyada studentlär, üüretmennär hem musaafirlär gagauzologiyanın eni tarafı - etnoregionalistika için sesledilär.  

2020-ci yılda Elizaveta Kvilinkova geçer yaşamaa Belorusiyaya. Orada da o gagauz diasporasınnan buluşêr, aaraştırmalar yapêr. Bu toplantıda avtor tanıttı «Гагаузы в Молдове и Беларуси: грани идентичности и стратегия самосохранения» (2023) kiyadını. Monografiyada Belorusiyada yaşayan gagauzları etnologiya, soţiologiya metodunu kullanarak analiz yapılmış.  

Bilimci teklif etti gençlerä unutmamaa kendi köklerini, yazmaa aylenin olaylarını, istoriyasını, bilmää dili.   

Sesleyicilär büük meraklan sesledilär  da şükür ettilär avtora onun bereketli aaraştırmaları için. Diledilär avtora saalık hem ileri dooru da taa çok aaraştırmalar yapsın.   

Janna Garçeva universitetin adından şükür etti avtora da verdi Şükür mektubunu.  

Elizaveta Kvilinkova lekţiyaya gelän kişilerä kendi kiyatlarını baaşladı. 

Bibliotekacılar Elizaveta Kvilinkovanın kiyatlarından oluşan bir sergi hazırladlar.  

Komrat Devlet Üniversitesi Bilim Biblioteka.