2026 yılın sentäbri–oktäbri periodunda REFLECT Phase II – “Quality learning through the peer-to-peer system in Moldova” halklararası proektın partner universitetlerinin temsilcileri proektın final konferențiyasına hazırlık için bir sıra online iş görüşmeleri geçirdilär. Final konferențiyası 5 noyabri 2026-da Kişinövda geçirilecek.
İş grubunda konsorțium universitetlerinin temsilcileri, Zürich Pedagogika Universitetinin (PH Zurich) komandası, proektın milli komandası, hem da Komrat Devlet Universitetindän REFLECT iş grubunun temsilcileri pay alêrlar.
17 sentäbrida keçirilän görüşmedä başlıca dikkat final konferențiyasının genel konțepțiyasına hem strukturasına verildi. Partnerlär hedef grupaların yapısını, katılımcıların paylaşımını, sabaalän iş sesiyalarının hem günortadan sora atölyelerin formatını, ayrıca proektın rezultatlarını katılımcıların real deneyimi aracılıınnan nasıl göstermää olanaklarını danıştılar. Ayrı olarak konferențiyanın sade REFLECT II fazasının sonuçlarını toplamak için diil, ama alınan rezultatların dayannıklılıını hem proektın ileri perspektivalarını danışmak için da bir platforma olması konusu incelendi.
28 sentäbrida olan sıradakı iş görüşmesi programın içerigina adandı. Partnerlär günortadan sora geçirilecek beş atölyenin temalarını uzlaştılar, içerigini hem praktik yönünü netleştirdilär, moderatorların hem raportörların rollerini böldülär. Ayrı dikkat atölye temalarının birbirini tekrarlamamasına hem REFLECT yaklaşımının türlü aspektlerini açmasına verildi: profesional üürenmä toplulukları hem rezultatların dayannıklılıı, peer-to-peer etkileşimi, refleksiv kompetențiyaların geliştirilmesi, konstruktiv geri bağlantı hem gözlemä instrumentları.
Komrat Devlet Universitetinin komandası da atölyelerin içerigi için teklifler sundu, universitetta hem üüredicilik idarä organnarının temsilcilerinnän işbirliindä REFLECT yaklaşımnarını uygulama hem pilotlama deneyiminä dayanarak.
20 oktäbrida konferențiyadan öncä son iş görüşmesi geçirildi. Bu etapta katılımcılar programın final strukturasını, atölyelerin hazırlık durumunu, moderatorlar hem raportörlar arasında sorumnulukların paylaşımını, iş sesiyalarının rezultatlarını sunma formatını, panel diskussiyasının içerigini hem konferențiyanın organizațiya meselelerini netleştirdilär. Görüşmä vakıdında bütün atölyelär hazırlanmıştı, program da son uzlaşma etapındaydı.
İş grubunun katılımcıları gelecek panel diskussiyasına da büük dikkat verdilär. Bu diskussiya proektın türlü hedef grupalarının temsilcilerini — universitet üüredicilerini, inspektorları, pedagogları hem mentorları, studentleri, ayrıca milli seviyedäki temsilcileri — bir araya getirecek.
İş görüşmelerinin seriyası partner universitetler arasında üüsek seviyeli işbirliini gösterdi hem konferențiyanın genel konțepțiyasını danışmaktan içerigini uzlaşmaya, sorumnulukları paylaşmaya hem organizațiya meselelerini çözmää kadar ardıcıl geçişä olanak verdi.
Gelecek final konferențiyası REFLECT II fazasının rezultatlarını düşünmäk, türlü hedef grupalar arasında deneyim paylaşmak hem Moldova Respublikasının üüredicilik sistemasında profesional refleksiya, karşılıklı üürenmä hem konstruktiv geri bağlantı kulturasını ileri geliştirmä olanaklarını danışmak için önemli bir platforma olacak.
Publikațiya: Curteva O.V., Komrat Devlet Universitetindän REFLECT proekt koordinatoru
