23 sentäbri 2026-da Komrat Devlet Universitetindä “REFLECT metodologiyasına görä ders gözlemelerinin pilotlanması: rezultatlar, zorluklar hem ileri adımlar” adlı Follow-up seminar geçirildi. Seminar REFLECT Faza II – „Învățare de calitate prin sistemul de la egal-la-egal din Moldova” proektı çerçevesindä hazırlandı. Etkinniyä Gagauziya, Taraklı hem Basarabeaska üüredicilik idarälerinin inspektorları katıldılar.
Seminar öncä geçirilen üüretimin devamı oldu hem REFLECT yaklaşımnarının üüredicilik kurumlarında praktika içindä kullanılma deneyiminin analizinä adandı. Başlıca dikkat ders gözlemelerinin pilotlanma rezultatlarının analizinä, profesional deneyim paylaşımına, ortaya çıkan zorlukların belirlenmesinä hem gözlemä, refleksiyaya hem kanıtlara dayalı geri bağlantının ileri kullanılmasına verilän adımların belirlenmesinä verildi.
Çalışma sırasında katılımcılar geçirdikleri ders gözlemelerinin rezultatlarını sundular, REFLECT metodologiyasının türlü üüredicilik kurumlarında uygulanma özelliklerini görüştülär, başarılı praktikaları hem problemalı tarafları analiz ettilär. Ayrı bir dikkat gözlemä hazırlanma etaplarına, fakt bilgilerinin kaydedilmesinä, refleksiv dialogun kurulmasına hem geliştirici, baa vermeyän geri bağlantının verilmesinä ayrıldı.
Seminarın interaktiv formatı katılımcılara REFLECT-in temel ideyalarını kendi profesional deneyimnerinnän baalamaya, fikir paylaşmaya hem ileri metodik destek isteyän yönneri birliktä belirlemäyä olanak verdi. Görüşmenin önemli bir bölümü REFLECT elementlerinin üüredicilik kurumu, üüredicilik idaräsi hem Moldova Respublikasının Üüredicilik hem Araştırma Ministerlii seviyelerindä korunması hem ileri uygulanması olanaklarına ayrıldı.
Seminarın sonunda katılımcılar ileri konkret adımları belirledilär hem ders gözlemä praktikasında hem pedagogların desteklenmesindä REFLECT yaklaşımnarının kullanılması için profesional sonuçlar çıkardılar.
Seminarın çalışmasını Komrat Devlet Universitetinin REFLECT proekt komandası saaladı: Oxana Curteva, pedagogika bilimneri doktoru, universitär konferențiar, KDU tarafından proekt koordinatoru; Tatiana Velicova, doktor, universitär konferențiar; Galina Mutaf, doktor, lektor; Prascovia Nicolaeva, üüredici; Galina Mutcoglo, üüredici.
Geçirilän Follow-up seminar üüretim etapından REFLECT-in real praktikada uygulanma deneyiminin analizinä geçmäyä hem üüredicilik kurumlarında gözlemä, refleksiya hem geliştirici geri bağlantı praktikalarının desteklenmesi için ileri profesional işbirlii yönnerini belirlemäyä olanak verdi.
Publikațiya: Curteva O., proekt koordinatoru
