20–23 avgust 2026 yıllarında Komrat Devlet Universitetinin iş grupası UNI-HEALTH halklararası proektin – “Academic partnership for health improvement of youth with health disorders and special needs” – final raport konferențiyasında pay aldı. Proekt Erasmus+ KA220-HED – Cooperation Partnerships in Higher Education programası çerçevesindä gerçekleştirilär. Konferențiya Trakiya Universitetinin Tsarevo kasabasındakı kampusunda, Bulgariyada, geçti hem proekt-partnör organizațiyaların temsilcilerini birerdä topladı. Üüredicilik, araştırma, sport hem cümnä organizațiyaların ortak işi student gençlerin saalıı, fizika aktivlii hem ii oluşu problemalarına kompleks yanaşmayı gerçekleştirmää deyni imkan verdi.
Komrat Devlet Universitetini konferențiyada UNI-HEALTH proektin iş grupası temsil etti: Oxana Curteva – pedagogika bilimneri doktoru, universitar konferențiar, KDU tarafından UNI-HEALTH proektin koordinatoru; Angela Polevaia-Secareanu – doktor, universitar konferențiar; Liudmila Ibrisim – doktor, okutucu; Stela Cucereanu – doktor, okutucu.
Final konferențiyanın başlıca maadı proektin gerçekleştirilmesinin sonuçlarını toplamak, kazanılmış rezultatları göstermäk, partnörlar arasında başarılı praktikalarla paylaşmak hem hazırlanmış materialların hem yanaşmaların universitet ortamında ileridä kullanılma imkanlarını konuşmaktı.
Konferențiya çerçevesindä Komrat Devlet Universitetinin komandası proektin başlıca yönnerindä kendi işinin rezultatlarını gösterdi. Ayırı dikkat studentlerin fizika hem psihologiya saalıını kaavileştirmää, saalıklı yaşamak kulturasını oluşturmaa, stresä dayanıklılıı geliştirmää, fizika aktivliini artırmaa hem destekleyici universitet ortamını yaratmaa yönelik işlere verildi.
KDU temsilcileri proektin hedef grupasındakı studentlärlän yapılan araştırma hem praktika işlerinin rezultatlarını sundular. UNI-HEALTH proektin gerçekleştirilmä periodunda studentlerin fizika, funkțional hem psihologiya durumunun monitoringu yapıldı, onların saalık hem ii oluş göstergeleri diagnostika edildi, saalıklı yaşamaya adanmış üüredici hem praktika çalışmaları geçirildi.
KDU işindä önemli bir er stres-menecment hem öz-reguläțiya becerilerini geliştirmää, studentlerin psihologiya ii oluşunu desteklemää, onların stresä dayanıklılıını kaavileştirmää, hem da emoțional bakımından güvenni hem destekleyici üüretim ortamını yaratmaa verildi.
Ayırı bir yön saalıklı hem balanslı beslenmä kulturasını oluşturmaklan baalıydı. Studentlär için tematik çalışmalar hem danışmalar geçirildi, yiyecek seçiminä hem kendi saalıına bilinçli yanaşmayı oluşturmaa deyni praktika tavsiyeleri hem informațiya materialları hazırlandı.
Proektin önemli bir parçası fizkultura-saalık hem sport çalışmaları oldu. Studentlärlän saalık gimnastikası, fitnes hem türlü fizika hem sport aktivlikleri geçirildi. Ayırı dikkat fizika yüklerin insanın individual saalık durumuna uygunlaştırılmasına, studentlerin regular fizika aktivliinä motivațiyasına hem saalıklı yaşamak için kalıcı ihtiyacın oluşturulmasına verildi.
Konferențiya sırasında bütün partnör organizațiyaların temsilcileri kendi işlerinin rezultatlarını gösterdilär, deneyimnän paylaştılar hem hazırlanmış metodika materiallarının, üüretim programalarının hem wellness-praktikaların universitetlerin işindä ileridä kullanılma imkanlarını konuştular.
Final buluşmanın programası sport, kultura hem soțial çalışmaları da içindä tuttu. Bu çalışmalar partnörluk baalantılarını kaavileştirmää, kulturaarası danışmayı geliştirmää hem aktiv, saalıklı yaşamayı popularizațiya etmää yardım etti.
Proektin önemli final produktlarından biri studentlär için ortak metodika klavuzu olacek. Bu klavuzda UNI-HEALTH partnörları tarafından hazırlanmış hem praktikada sınanmış materialları hem tavsiyeleri sistematizațiya etmää hem göstermää planlanêr. Böyleliklän, klavuz partnörların topladığı halklararası deneyimi birleştirecek hem studentlerä fizika hem psihologiya saalıını korumaa hem kaavileştirmää deyni konkret instrumentlar, çalıştırmalar, tavsiyelär hem praktikalar verecek.
Komrat Devlet Universitetinin UNI-HEALTH proektindä pay alması halklararası işbirliinin geliştirilmesinä, profesional deneyim paylaşımına, studentlerin saalıını hem ii oluşunu desteklemek için eni yanaşmaların uygulanmasına hem gençlerin fizika, psihologiya hem soțial ii oluşuna yönelmiş universitet ortamının oluşturulmasına yardım etti.
Komrat Devlet Universitetinin iş grupası final konferențiyanın organizatoru Trakiya Universitetinä buluşmanın yüksek organizațiya seviyesi, konukseverlik hem sıcak, açık profesional işbirlii atmosferasını yaratması için can-ürektän saa olsun deyer. Ayırı teşekkürümüzü doktor, doțent Georgi Kalaydzhievä hem Trakiya Universitetinin bütün komandasına konferențiyanın organizațiya desteği hem dostça atmosferası için bildireriz. Bu ortam ortak işin efektiv olmasına hem partnörların canlı profesional danışmasına yardım etti. Hem da Prof. Dr. Kemal Çelikä (Çanakkale Onsekiz Mart University) Komrat Devlet Universitetinä bu proekttä pay almak imkanını verdii için teşekkür ederiz.
UNI-HEALTH halklararası konsorțiumu türlü devletlerdän dokuz universiteti hem profil organizațiyasını birerdä topladı: Trakiya Universiteti (Bulgariya), Pavlodar Devlet Pedagogika Universiteti (Kazahstan), Çanakkale Onsekiz Mart University (Türkiye), Komrat Devlet Universiteti (Moldova Respublikası), University North / Sveučilište Sjever (Horvatiya), Centro Nazionale Sportivo Libertas Associazione di Promozione Sociale (İtaliya), Senergy Elemzo es Kutato Nonprofit Korlatolt Felelossegu Tarsasag (Macaristan), Udruzenje gradjana Osvezenje (Serbiya) hem Phasegrowth OÜ (Estoniya).
Final konferențiya UNI-HEALTH proektin önemli tamamlayıcı etapı oldu. O, halklararası konsorțiumun çok yıllık ortak işinin rezultatlarını toplamaa, kazanılmış deneyimi göstermää hem hazırlanmış yanaşmaların, metodika materiallarının hem praktikaların partnör universitetlerin işindä ileridä kullanılma perspektivalarını belirlemää imkan verdi.
Oxana Curteva, doktor, universitar konferențiar, proektin instituțional koordinatoru
