UNI-HEALTH halklararası proektinin sonuç raport konferențiyası öncesindä, “Academic partnership for health improvement of youth with health disorders and special needs” proekti Erasmus+ KA220-HED – Cooperation Partnerships in Higher Education programası çerçevesindä gerçekleştirilärkänä, Komrat Devlet Universitetinin işçi grupası ortak çıkışa hem proekt çerçevesindä elde edilän sonuçların prezentatsiyasına hazırlık için online buluşma geçirdi.

İşçi buluşmada KDU komandasının azaları pay aldılar: Oxana Curteva – pedagogika bilimneri doktoru, konferențiar universitar, proektin instituțional koordinatoru; Angela Polevaia-Secareanu – doktor, konferențiar universitar; Liudmila Ibrisim – doktor, öüredici; Stela Cucereanu – doktor, öüredici.

Baş dikkat Komrat Devlet Universitetinin sonuç prezentatsiyasının içeriinä verildi. Pay alanlar çıkışın logikasını hem strukturasını konuştular, halklararası partnerlerä gösterilmesi gereken temel sonuçları belirlediler, tematika bloklarını paylaştırdılar hem komanda azalarının çıkış sırasını uygunlaştırdılar.

Prezentatsiyaya KDU-nun proektin temel yönnerindä elde ettii sonuçlar katıldı: maasuz grupadan studentlerin fiziki, funkțional hem psihologiya durumlarının monitoringi, psihologiya ii oluşun desteklenmesi hem stresä dayanıklılığın geliştirilmesi, saalıklı hem balanslı beslenmä kulturasının oluşturulması, fizkultura, wellness hem sport çalışmalarının organizațiyası, hem dä destekleyici universitet ortamının yaratılması.

Buluşmada ayrıca proektin en önemli praktika sonuçlarının seçilmesine özel dikkat verildi: hazırlanmış tekliflär hem materiallar, studentlärlän geçirilän derslär, treninglär, konsultatsiyalar hem başka çalışmalar, angıları saalıklı yaşamak kulturasını hem gençlerin kendi saalığına sorumlu yaklaşımını geliştirmää dooruduldu.

İşçi grupasının azaları sonuçların vizual gösterilmesini dä konuştular: prezentatsiyada fotografların, shemaların, monitoring datalarının hem praktika çalışmalarından örneklerin kullanılması, Komrat Devlet Universitetinin UNI-HEALTH proektinin gerçekleştirilmesinä katkısını dolu göstermäk için.

Online buluşma KDU komandasının proektin sonuç raport konferențiyasına hazırlığında önemli bir etap oldu. Konferențiya 20–23 avgust 2026 yıllarında Bulgariyanın Țarevo kasabasında, Trakiya Universitetindä geçecek. Ortak hazırlık işi toplandı deneyimi sistematizațiya etmää, universitetin iş sonuçlarını bir bütün sistema olarak göstermää hem proektin halklararası konsorțiumu önündä uygunlaştırılmış komanda çıkışını hazırlamaa kolaylık verdi.

Publikațiyayı hazırladı:
 Oxana Curteva, pedagogika bilimneri doktoru, konferențiar universitar,
 UNI-HEALTH proektinin instituțional koordinatoru