2026 yılın aprilin 10-da Komrat Devlet Universitetindä, Gagauz dili hem kulturası merkezindä, Vitaliy SIRF, gagauz filologiyası hem istoriya kafedrasından üüretmen, filologiya bilgilerindä doktoru GR-24 grupanın studentlärlän "Gagauz literaturanın istoriyası: 2-ci pay" disţiplinasında hazırladı açık seminar, angısı adalıydı gagauz yazıcısının Aleksandra KRİSTOVAnın yaradıcılaa.
Seminarda pay aldılar gagauz filologiyası hem istoriya kafedrasının üüretmenneri: pedagogika bilgilerindä doktor Galina MUTAF, filologiya bilgilerindä doktor Güllü KARANFİL, soţiologiya bilgilerindä doktor Sergey HOROZOV, Galina MUTKOGLO, Natalya DUŞKOVA, studentlär.
Aleksandra Kristova annattı kendisi için, kendi yaşamak hem yaratmak biografiyası için, detallı açıkladı herbir tiparlanmış literatura toplumunun (‘Cıvırliga türküsü’, ‘Lüzgerä karşı’, ‘İnan alfabeti’) içindelii. Bundan sora GR-24 grupanın studentleri (Olga KARA, Mariya UZUN, Anna PULUKÇU) kendi sözlerindä paylaştılar fikirlerinnän, ne kablettilär onnar yazıcının okunmuş yaratmalarından, nışannadılar onnarın patriotik ruhunu, etnokultura hem religiya payları, onnarın şıralı hem zengin dili, süretlik hem stilin poetikası. Üüretmennerin tarafından söz tuttu Natalya Duşkova, angısı küüdaş gibi (Kongazçık küüyü, Komrat rayonı, Gagauziya, Moldova Respublikası) hem da kär senselä gibi, açıkladı sesleyecilerä yazıcının insan kaliteleri, onun dikkatlıı aalemä hem dolay dünnää. Sonunda o Aleksandra Kristovaya diledi saalık, kısmet, iilik hem eni başarılar yaratmak uurunda. Onun laflarına katıldılar hepsi seminarda pay alannar.
Seminar geçti sıcak ortalıında, studentlär kablettilär hem islää notalar cuvaplar için, hem pozitiv kef ötäänkı üürenmäk programasına.
