Aprilin 30-unda 2026 y. Komrat Devlet Universitetindä gagauz filologiyası hem istoriya kafedrası «Gagauz dili hem kulturası» disţiplinasında XII Olimpiadayı geçirdi, anılmış gagauz aydınnadıcısı Mihail Çakirin 165-inci yıldönümünä baalıydı. (1861-1938).

Millet kultura fakultetinin dekanı doktor, konferentiar Oksana Kurteva kutladı studentleri Mihail Çakirin 165 yıldönümünnän hem ii başarıları diledi onnara.

KDU baş bibliotekacı Anna Kösä  protoierey Mihail Çakir için sergiyi hazırladı  hem studentlerä aydınnadıcının izini gagauz kulturasında, istoriyasında açıkladı.

Olimpiadaya katıldılar Komrat Devlet Univrersitetindan ekonomika, yuridik, millet kultura hem agrar fakuktetlerdän studentlar.  Studentlär registraţiya yaptılar Komrat Devlet Universitetinin Moodle platformasında. Registraţiya listesinä görä, Olimpiadaya yazıldı  22 student, da hepsi bütün programayı tamannadı.

İlk denemak test Moodle platformasında geçirildi.

Cuvaplardan belli oldu, ani  hepsi studentlär islää biler gagauzların kulturasını, adetlerini, aylä paalılıklarını, kendi senselelerini.

Hep bu gün gagauz dili üüredicilerindän kurulu maasuz komisiya (doktor, üüretmen Güllü Karanfil, doktor, üüretmen Galina Mutaf hem üüretmen, magistr Natalya Duşkova) kazanılmış notaları toplayıp, çıkışları yaptı. Komisiya azaları hesap aldılar, ani studentlerin çoyu gagauzça gözäl lafeder, diskusiyaya katılmaa becererlär hem kendi düşünmeklerini akıllı argumentleerlär.  Herbir studentlerin toplandıı ballarını saydıktan sora bütünneşik balı toplandı, da kazanılmış erlär belli oldu. Sonuçları hem çıkışları cümneyä bildireriz:

I-inci eri kazandı Ekaterina Serova - AN-25 grupadan student,

II-nci eri kazandı Vitaliy Tumba - EF-25 grupadan student,

III-üncü eri iki kişi kazandı: - Sergey Pulukçu - PM-25 grupadan student,

                                                - Viktor İvançev - İM-25 grupadan student.

«Gagauz dili hem kulturası» disţiplinasında XII Olimpiadaya hepsi katılannara jüri azaları verdilär baaşış – katılım sertifikatı, gagauz dilinda ‘Bibliyadan annatmalar’ , boyalı kiyatçık, «Guguşçuk» jurnalı.

Olimpiadanın musaafiri oldu İlya Karaseni, Gagauziyanın patriotu, bloger, angısı getirdi yukarda sıralı kiyatları hem anattı, kim yardım etti bu kiyatları tiparlamaa.

Çok saa ol İlya Karaseni yardım için!

Teklif ederiz hepsi studentleri, gelän yıla XIII Olimpiadaya katılsınnar, ana dilindä lafetsinnär hem gagauz dilindä hem kulturasında bilgilerini denesinnär.