Sentäbrinin 14-dä Gavril Arkadieviç Gaydarcının (1937–1998) duumasından 89 yıl tamamnandı. O filologiya bilimneri doktoruydu, yazıcıydı, pedagogtu hem şindiki gagauz dilbilimin kurucularından biriydi. Bu gündä Komrat Devlet Universitetinin Gagauz filologiyası hem istoriya kafedrasının hem Türkologiya departamentının üüretmennäri hem studentleri bilim adamının anısını saygıladılar hem Şan Aleyasında bilim adamının büstünä çiçek koydular.
Bilimä hem kulturaya temel izmeti:
- Dilin standartlaştırılması: Latin grafikasında gagauz alfavitinin kontseptsiyasını hazırladı (1993) hem „Gagauz dilinin orfografiya hem punktuatsiya kuralları” (1995) çalışmasının avtoru oldu.
- Bilim mirası: Sintaksis için temel monografiyalar yazdı, „Gagauzça-rusça-moldovanca sözlük” çalışmasına avtor ortaklığı yaptı hem 1998-ci yılda Moldova Bilimnär Akademiyasında türk dilleri için doktoranturanın açılmasını başardı.
- Dünnää ölçüsündä tanınması: „Evropanın Lingvistika Atlası” proektindä hem Türk Dil Kurumunun türk dillerinin karşılaştırmalı gramatikası için çalışmalarında pay aldı.
- Literatura çalışmaları: „Ana tarafım” peet toplamasının avtoru oldu, hem uşaalara deyni folklor yayınnarı hazırladı.
Halkın önündä izmetleri için G. A. Gaydarcıya „Moldova Respublikasının bilimdä şannı zaametçisi” hem „Gagauziyanın şannı vatandaşı” adları verildi. Büün Komrat teoretik litseyi hem duuduğu Karbaliya küüyündä bir sokak onun adını taşıêr. Gagauziyanın M. Maruneviç adına Bilim-aaraştırma merkezi tarafından 2018-ci yılda „Gagauzluk XIX–XXI asırlar” seriyasında çıkarılan onun çalışmalarının iki tomnusu gagauzluk biliminin en paalı miraslarından biri kalêr.
