Pötr Draganov adına Merkez bibliotekasında gagauz yazıcısı, peetçi, pedagog Konstantin Vasilioglu 85- yıldönümünnän baalı Tombarlak masası geçti.
Gagauz filologiyası hem istoriya kafedrasından üüretmenneri doktor, lektor, kafedra başı Mutaf Galina; doktor, lektor Karanfil Güllü; doktor, lektor Sırf Vitaliy hem KDU bibliotekasının başı Garçeva Janna tombarlak masasında katıldılar.
Mutaf G.N. ‘Konstantin Vasilioglunun uşaklara
deyni yaratmaları’ temaya doklad okudu. Sırf V.İ. ‘Константин Василиоглу – мастер написания сказок для детей’ temaya dooklad okudu. Garçeva Janna ‘Научно-педагогическая деятельность К.К.Василиоглу’ temaya.
Tombarlak masasında Komrat istoriya hem memleketi aaraştırmak muzeyın direktoru Vladislav Marinov, D.Karaçobanın adına Milli istoriya hem etnografiya muzeyin başı Lüdmila Marin, regional bibliotekalardan zaametçileri katıldılar.
Konstantin Konstantinоviç girer gagauz yazıcıların II-nci pleyadasına. İkinci dalgaylan literaturaya girdiktän sora çok şkola kiyadı hazırladı, türlü programalar, kurikulumnar, sözlüklär, testlär hem sekiz kiyadı kendi yaratmalarınnan basıldı: şiir toplumu “Sevgilim”, “Vatanım – Bucak”, “Masallar. Uygun sözlär. Bilmeycelär”, “Bucak dannarı” (şiir toplumu), proza toplumu “Olimpiada”, “Sofra”, “Cömert tarafim”, “Masal dünnesi”, ‘Kelebek düünü’ – yaratma toplumu küçüklerä deyni, kiyat “Okumak – sevgili zanaatım”.
Yaratmalarında K.Vasilioglu yazȇr taa çok şkolacıların üürenmesi için, onnarın dostluu için, meraklı yaşaması için. Büük er kaplȇȇr yazıcının yaratmalarinda temalar: Vatan, halkın eceli, duuma er h.b.
1959-cu yılda – yazıcının şiirleri girdi ilk yaratma toplumuna “Bucaktan seslär”, angısının baş redaktoru oldu D.Tanasoglu. Hep bu yılda da K.Vasilioglu başlêêr üürenmää Tiraspoldakı pedagogika institunda T.Şevçenkonun adına. 1965-ci yılda o kabletti rus üüredicisi diplomunu. Ozamandan beeri işledi üüredici küçük klaslarda da, büüklerdä dä; gagauz dilini dä üüretti, rus dilini dä. Sora direktor yardımcısı da oldu, taa sora direktor ekmeeni da dattı.
Kişinöv Devlet Pedagogika Universitetindä gagauz dilini götürärdi. 1990-cı yılda çalıştı Pedagogika hem Psihilogiya İnstitunda bilim zaametçisi.
Çok kiyatlar o hazırladı üüredicilik uurunda: “Rus dili” hem “Rusça okuyêrız”, ‘Gök kuşaa’ - üürenmäk kiyadını 2-ci klaslarına deyni (2006), “Sızıntıcık” hrestomatiya 1-2 klaslara deyni, “Benim ilk kiyadım”; “Ana dili” – 3-cü klaslara deyni; “Ana dili” – 4-cü klaslara deyni; “Gagauz dili hem literatura okunmakları”- 5-ci klaslara deyni; “Gagauz dili hem literatura okunmakları” - 6-ci klaslara deyni; “Gagauz dili hem literatura okunmakları”- 7-ci klaslara deyni h.b.
Gagauziya Bakannık Komitetin kararında (çiçek ayın 28-dä 1998-ci yıldan) yazılı: “Büük zaamet koymak gagauz filologiyasını hem millet kulturasını ilerletmäk için, şkola kiyatlarını kurmak için hem 60 yıldönümünü esaba alarak, vermää Vasilioglu K.K., Pedagogika hem psihologiya bilimneri İnstitunu başına, bilim zaametçisinä bir üüsek titul “Gagauziyanın Saygılı Vatandaşı”.
65 yıldönümündä Cänabisinä verdilär taa bir üüsek titul – “Komrat Muniţipiyanın Saygılı Vatatandaşı”.
İnformaţiyayı hazırladı Mutaf G.N.
