(1925-2009)
Lüdmila Aleksandrovna duudu mardın 18-dä 1925-inci yılda Leningradta.
Başkiriyada orta şkolayı bitirdiktän sora 1944-üncü yılda Leningrad universitetin günduusu fakultetindä üürenmää başladı. Onun baş üüredicisiydi anılmış rus türkologu profesor – N.K.Dmitriev. Ondan L.A.Pokrovskaya seftä işitti gagauzlar için hem onnarın dili için. V.A.Moşkovun kiyadını ‘Наречия бессарабских гагаузов’ okuduktan sora Lüdmila Pokrovskaya praktikayı geçmää deyni 1948-inci yılda yazın geler Bucak tarafına. O durdu ozaman Valkaneşttä hem Çeşmä küüyündä, gitti Tülü hem Kurçu küülerinä. O beendi gagauz türkülerini hem maanilerini, başladı toplamaa onnarı. 1949-cu yılda yazdı diplom işini ‘Гагаузские народные песни’.
Başardıynan üürenmeyi, Pokrovskaya aspiranturaya girdi. Sora taa iki kerä geldiydi gagauzlara, onnar için dokumental film çıkardı, disertaţiyasını ‘Песенное творчество гагаузов’ yazdı.
1954-cü yılda profesor N.K.Dmitriev Pokrovskayayı Moskvaya teklif etti türk dillerini aaraştırmaa deyni. Orada Bilim Akademiyasında Lüdmila Aleksandrovna 22 yıl işledi. 1957-ci yılda gagauz dilinä yazı verildi. L.A.Pokrovskaya D.N.Tanasogluylan barabar yazdılar gagauz dilinin orfografiya kurallarını.
L.A.Pokrovskayanın kiyadı ‘Грамматика гагаузского языка. Фонетика и морфология’ Moskvada 1964-cü yılda tiparlandı. Lüdmila Pokrovskaya pay aldı ‘Gagauzça-rusça-moldovanca sözlüü’ hazırlamasında, angısı 1973-üncü yılda çıktı.
1978-inci yılda çıktı onun kiyadı ‘Синтаксис гагаузского языка в сравнительном освещении’. L.A.Pokrovskaya KDU-da işledi, hazırladı kiyatları studentlerä deyni:
- Современный гагаузский язык. Курс лекций. (1997)
- Синтаксис современного гагаузского языка. Предложение. (1999)
- Gagauz dilinin orfografik laflıı. Komrat. 1999
L.A.Pokrovskaya pay aldı halklar arası bilim konferenţiyalarda, angıları geçtilär: Moskvada, Sofiyada, Berlindä, Ankarada, Buharesttä h.b. da.,
2009-cu yılda oktäbrinin 7-sindä L.A.Pokrovskaya geçindi.