Aprilin 16-sında 2024 y. Komrat Devlet Universitetindä gagauz filologiyası hem istoriya kafedrası «Gagauz dili hem kulturası» disţiplinasında X-uncu Olimpiadayı geçirdi.

Agrar, ekonomika, yuridik, millet kulturası fakultetlerindä üürenän studentlär, ani istedilär katılmaa Olimpiadaya, Universitetin Moodle platformasında öncä registraţiya yaptılar. Registraţiya listesinä görä, Olimpiadaya yazıldı 17 kişi, ama bütün programı tamannadı sade 14 student.

İlk iş geçti Moodle platformasında – studentlär tamannadılar bir test «Gagauzların senseleleri hem hısımnarı». Cuvaplardan belli oldu, ani studentlär hepsi islää biler kendi senselelerini hem sayȇr onnarı.

İkinci iş – gagauz dilindä verili temaya görä 5-10 minutluk aazdan annatma. Gençlär annattılar ana tarafımız için, dostluk hem annaşmak için, çalışmak hem üürenmäk için hem t.b. Studentlär gözäl lafeder gagauzça, becererlär diskusiyaya katılmaa hem kendi düşünmeklerini akıllı argumentlemää. 

Aprilin 23-ündä 2024 y. gagauz filologiyası hem istoriya kafedrası, toplayıp studentleri, çıkışları yaptı. Herbir studentin toplandıı ballarını saydıktan sora çıkışlar hem erlär belli oldu. Sonuçları hem şu çıkışları cümneyä bildireriz:

I-inci eri kazandılar – millet kulturası fakultetindän Balova Anastasiya, millet kulturası fakultetindän Nenova Lüdmila;

II-nci eri kazandılar – yuridik fakultetindän Kapsamun Elvira, ekonomika fakultetindän Kristeva Valentina;

III-üncü eri kazandılar – yuridik fakultetindän Kalçu Artöm, ekonomika fakultetindän Kasım İvan, yuridik fakultetindän Kavalji Vadim, yuridik fakulteindän Stefoglo Nikolay.

Başka katılannar da – Burgudji İvan, germek-Çolak Viktoriya, Stançeva Kristina, Stançu Karina – üüsek uurda bilgilerini hem gagauz dilindä söz kompetenţiyalarını gösterdilär.

«Gagauz dili hem kulturası» disţiplinasında X-uncu Olimpiadaya hepsi katılannara jüri azaları (Mutaf G.N., Bankova İ.D., Güllü Karanfil, Duşkova N.İ.) verdilär baaşış – diplom, gagauz yazıcısının K. Vasilioglunun annatma hem peet toplumu, «Ata sözleri» tolumu, lingvistika terminneri sözlüü, «Guguşçuk» jurnalı h.b. 

Teklif ederiz hepsi studentleri, gelän yıla Xİ-inci Olimpiadaya katılsınnar, ana dilindä lafetsinnär hem gagauz dilindä bilgilerini denesinnär.