Аprelin 16-da 2024-cü yılda gagauz filologiyası hem istoriya kafedrasından üüretmennär: Mutaf G.N., pedagogika bilimnerindä doktor hem Sırf V.İ., filologiya bilimnerindä doktor Moldova Respublikasının Parlamentindä “Gagauz yazısı hem dili Günü” sırasında katıldılar. Şvețiya devletin CMİ fondu Moldova Respublikasının Parlamentinnän barabar hazırladı hem geçirdi bu sırasını, angısı Gagauz dili gününnän hem gagauzların aydınnadıcısının Protoierey Ay-Boba Mihail Çakirin duuma gününnän baalı.
“Gagauz yazısı hem dili Günü” sırasını açtı hem götürdü Moldova Parlamentin deputatı Larisa Voloh. Selemnemä nasaatlarınnan söz tuttular Moldova Parlamentın spikerı İgor Grosu hem Moldovada Şvețiya Büükelçisi Katarina Freid.
Bundan sora sıra için hazrılanan gagauz yazıcıları hem bilimcileri sergi için Avdarma küüyün istoriya muzeyin direktoru Elena Karamit annattı. Sergidän sora oldu iki sesiya toplantısı: “Dünneyä gelmeleri, istoriya hem gagauz dili” hem da “Milli giimnär hem gagauzların adetleri”. Bu iki sesiyada da konuların arasında vidiolar gösterildi.
I sesiyada söz aldılar:
– Larisa Voloh, Moldova Parlamentinin İlerlemä hem cümnä çorbacılıı Komisiyanın başı;
– Vitaliy Sırf, filologiya bilimnerindä doktor, Kultura merasını İnstitutun baş bilim uzmanı;
– Ekaterina Jekova, Gagauziya Halk Topluşunun eks-deputatı, “Gagauz dilinin kullanmak sferasının genişledilmesi için” kanonun ortak avtoru.
II sesiyada söz aldılar:
– Liliana Nikolesku-Onofrey, Moldova Parlamentinin Kultura, üüredicilik, aaraştırma, gençlik, sport hem mas-mediya Komisiyanın başı;
– Vitaliy Gavruk, Moldova Parlamentinin deputatı.
Sesiyalardan sora Eduard Stoykov uşak ansamblisinin öndercisi uşaklarlan akapella gagauzça türkü çaldılar.
Toplantının sonunda Todur Zanet, gagauz baaşladı Moldova Parlamentinin bibliotekasına kendi peet kiyadını “Gagauzluk: Kultura. Ruh. Adetlär” hem da 3 tomlu kiyadını 1. “Gagauz halk masalları”; 2. “Gagauz türküleri, söleyişleri, bilmeceleri”, 3. “Gagauz yortuları, adetleri, sıraları” baaşladı.
Bilgi hazırlayan: Mutaf Galina, pedagogika bilimnerindä doktor, gagauz filologiyası hem istoriya kafedrasının başı
