Sentäbrinin 23’ündä 2024 yılında Komrat Devlet Universiteti Yabancı Dillär Bölümü Doç. Dr. Sofia Sulak İngiliz hem Alman Dili bölümü, AN-21 grubu lisans üürenicilerine Gagauz Yeri Avtonomiyası lițeylerindä yapılacak pedagogika praktikası hem rapor hazırlama için bir bilgilendirmä üüretimi geçirdi. Bu bölümün lisans üürenicileri için pedagogika praktikası,  üüretim programası çerçevesindä geçer hem pedagojik bir harakter taşêêr. Pedagogika praktikasının süresi, üüretim sürecinin akademik planına görä belirlener da 4 hafta sürecek (23.09.2024’ten 20.10.2024’e kadar). Bilgilendirmä sırasında üürenicilerä pedagogika praktikasının hedefleri, aşamaları, raporun hazırlanması hem korumasınnan baalı lääzımnı bilgilär verildi. Bundan kaarä praktikanın kendisi hem praktikanın raporu için lääzımnı dokumentațiya, praktika günnüün doldurulması, raporun verilmesi hem korunması için datalarlan baalı detaylı bilgi verildi. Pedagogika praktikasının hedefi, üüretim sürecindä edinilen teorik bilgilerin kaavileştirilmesi, praktik beceri hem kompetențiya kazanılması, üüsek uurda deneyimlerin üürenilmesi hem diploma işi için lääzımnı materyalların toplanmasıdır. Üürenicilerä kolaylık olsun deyni MOODLE üüretim platformunda "Yabancı Dillär" bölümünün III. hem IV. kurs üürenicileri için hazırlanmış "Padegogika Praktikası İçin Üüretim İnstrukțiyası" hem temel dokumentlerin şablonnarı da verildi. Bilgilendirmenin düzennenmesindä, Komrat Devlet Universiteti Kalite Yönetimi hem Üüretim Süreci Departmanı praktika sorumnusu L.D. Topal da pay aldı, pedagogika praktikasınnan baalı bilgi hem üürenicilerin sorularına cuvap verdi.