2 oktäbridä Gagauziyanın Şannı pedagog’ı Lidiya Konstantinovna Baurçulu kendi yubileyini kutlêêr. O, çok yıllarını Komrat Devlet Universitetinin gagauz filologiyası kafedrasında üüredicilik işinä verdi.
Lidiya Konstantinovna 2 oktäbri 1946 yılında Çadır-Lunga kasabasında, işçi memurların aylesindä duudu. Onun pedagogika yolu 1964 yılında başladı: Kagul pedagogika uçilişçesini bitirdiktän sora başlangıç klasların üüredicisi olarak işledi. 1972 yılında Kişinöv Devlet Universitetinin istoriya fakultetini bitirdi hem Valkaneş kasabasının şkolasında istoriya üüretmää başladı.
1976 yılında kocasının Komrat rayonuna halk sudyasının işinä geçirilmesinnän baalı Lidiya Konstantinovna Komratın 7-ci şkolasına geçti. Burada ilkin başlangıç klasların üüredicisi olarak işledi, sora, şkolalarda ana dilini üürenmäk enidän başladıkça, gagauz dili üüredicisi oldu. Profesiya hazırlıını gagauz kulturasının aydınnadıcıları D. Tanasoglo hem G. Gaydarjı’nın hazırladıı özel kurslarda sürdürdü.
Onun biografiyasında eni basamak 1991 yılında Komrat Devlet Universitetinin açılmasınnan başladı. M. Maruneviç’in çaarmasına görä Lidiya Baurçulu hem kocası Afanasiy Panteleeviç gagauz filologiyası kafedrasında gagauz dili hem literaturası için büük üüredicilär olarak işlemää başladılar. Bu zamanda Leningradın belli türkologu L. Pokrovskaya’nan tanıştı. O, Komrada üüretmää gelmişti. Lidiya Konstantinovna Lüdmila Aleksandrovna’yı kendi evindä yaşamaa çaarıp, ona sıcak konaklık gösterdi. Büün bu olayın anısına Puşkin sokaanda, profesor Pokrovskaya’nın kaldıı evin önündä anma tabelası koyulmuştur.
1995 yılından Lidiya Konstantinovna gagauz filologiyası kafedrasının başının görevlerini yaptı. Moldovanın Bilim hem Üüretim Ministerliinin ekspert komisiyasına girdi, orada şkola urok kiyatlarına çok kerä reţenziya yazdı. Bölgä için pek önemli bir işi yaptı — Gagauziyanın Temel Zakonunu gagauz dilinä çevirdi.
2008 yılında L. K. Baurçulu M. Maruneviç adlı Gagauziyanın Bilim-Aaraştırma Merkezinin lingvistika bölümünä bilim işçisi olarak alındı. Orada ana dilinin hem literaturasının ilerlemesinä büük yardım etti.
Lidiya Konstantinovna her zaman aktiv bilim hem cümnä yaşamasına katıldı:
milli hem milletlärarası konferenţiyalara, simpoziumlara hem seminarlara katıldı;
gagauz dili hem literaturası için şkola olimpiadalarını hazırlamaa yardım etti;
avtonomiya için genç üüredici kadralarını hazırlamaa geniş iş yaptı.
Çok yıllar o, Komrat Devlet Universitetinin hem bilim bibliotekasının sadık dostu hem meropriyatiyalarının aktiv katılımcısı kalêr. Kendi toplamasından Lidiya Konstantinovna bibliotekaya çok paalı kiyat baaşladı. Büün bibliotekanın fondlarında onun işlerinin personal bibliografiya göstergesi saklanêr. Onu N. Garçu hazırladı. Bu gösterge onun yaratma mirasının genişliini hem türlü türlü olmasını gösterer.
Lidiya Konstantinovna 20-dän zeedä bilim statyasının avtoru, çevirici hem publiţisttir. Onun önemli işleri arasında:
„Rusça-gagauzça hukuk terminleri sözlüü” (2000 yılı, kocası A. P. Baurçulu’yla birliktä);
„Rusça-gagauzça-türkçä konuşma kiyatçıı” (2006 yılı, İ. A. Dyaçuk’la birliktä);
„Gagauzça sinonimnär sözlüü” (2010 yılı, T. Marinoglo, G. Karanfil hem E. Karamit’län birliktä; bilim redaktoru — E. Soroçanu).
Çok yıllık namuslu işi için Lidiya Konstantinovna „İş veteranı” medaliylän ödüllendi. 2010 yılında ona „Gagauziyanın Şannı pedagog’ı” adı verildi. Ana dilini ilerletmää yaptıı pek paalı yardım Gagauziyanın Halk Topluşunun, Üüretim Ministerliinin hem başka kurumların çok diplomnarınnan hem şannı gramotalarınnan tanındı.
Komrat Devlet Universitetinin bilim bibliotekasının kolektivi Lidiya Konstantinovna’yı yubileyinän candan kutlêêr! Bütün ürektän Saa saalık, ruh sıcaklıı, ii yaşamak hem çok mutlu yaşama yılları isteeriz!
Bilim bibliotekası
