2026-cı yılın Orak ayın 10-da Komrat Devlet Universitetın komandası pay aldı işçi grupanın toplantısında, ani adandı REFLECT Phase II halklararası proektın final konferențiyasını hazırlamaa — „Moldovada «eşittän eşidä» sisteması yardımınnan kaliteli üürenmäk”.
Toplantı online formatında geçti hem topladı proektın gerçekleştirilmesindä pay alan ortak universitetların temsilcilerini. Toplantının başlıca neeti oldu proektın final etapını birliktä planlamaa hem final konferențiyasının genel konțepțiyasını hazırlamaa. Pay alanlar danıştılar gelecek meropriyatiyanın neetlerini, onun genişliini, planlanan formatını, programanın strukturasını, neet grupalarını, hem dä işçi grupanın azaları arasında sorumnulukların paylaşılmasını.
Toplantı sırasında konferențiyanın başlıca organizațiya parametrileri kesinleştirildi. REFLECT Phase II proektın final meropriyatiyası planlanêr 2026-cı yılın Kasım ayın 5-indä hem geçecek Conference & Events – MIMI konferențiya kompleksindä. Beklenêr, ani konferențiya toplayacek yaklaşık 130 pay alannı, onnarın arasında proekt komandalarının, ortak universitetların, üüretim kurumlarının, regional üüredicilik yönetim strukturalarının hem başka ilgili organizațiyaların temsilcileri olacek.
Pay alanlar özel dikkat verdilär konferențiyanın neet auditoriyasını belirlemää. Planlanêr universitet üüredicilerini hem universitet komandalarının temsilcilerini, mentorları, pedagogika uurunda üürenän studentleri, şkola başçılarını hem üüredicilerini, regional üüredicilik yönetimlerinin temsilcilerini, inspektorları, ortak organizațiyaları hem REFLECT metodologiyasını yaymaa ilgili başka uzmannarı teklif etmää.
İşçi grupası urguladı, ani final konferențiyası dolgun hem dinamik bir meropriyatiya olmalı, angısında bütün teklif edilän pay alannar aktiv katılaceklar. Programa planlanêr plenarnıy bölümünü, proektın sonuçlarının gösterilmesini, universitetların hem üüretim kurumlarının başarılı praktikasının prezentatsiyasını, tematik master-klasları, grupa danışmalarını hem praktika paylaşmasını koymaa.
Komrat Devlet Universitetın organizațiya grupasının işindä pay alması yardım eder universitet komandasının REFLECT Phase II proektını gerçekleştirmä zamanı topladıı denemeyi göstermää hem onun proektın final meropriyatiyasını hazırlamakta aktiv katılmasını sağlamayaa.
Publikațiya: Kurteva O., doktor, konferențiar, proektın instituțional koordinatoru
