Gagauz filologiyası hem istoriya kafedrasında MPG-22 grupada üürenän studentlär iyünün 17-sindä 2024 y. magisterlik disertaţiyalarını korudular. Bütün grupada 10 kişi 2-yıllık üüretim programını doludan başardılar, profesional praktikayı geçtilär, aaraştırma işini disertaţiya formatında yazdılar, öncä korumayı geçtilär da devlet kontroluna hak kazandılar. Son korumaya 9 student geldi.
Hepsi 9 kişi hazırladı disertaţiyasını Komrat Devlet Universitetin Reglamentindä belli edili bilim hem tehnika istediklerinä görä. Vakıtça başarıp işi, bilim öndercisi hem magistrant öncä geçirdilär disertaţiyaları «Antiplagiat» programından, angısı diplom işlerin üüsek uurda originallıını gösterdi.
Magisterlik disertaţiyalarını korumak geçti Devlet komisiyasının açık oturuşunda. Bu yıl komisiya azalarını MR Üüretim ministerlii belli etti, katıp bu proţesä üüsek uurda gagauz dili üürediçilerini hem görgülü didaktika kadrularını.
Devlet ekzamen komisiyası nışannadı, ani hepsi magisterlik disertaţiyalarının temaları haliz aktualdır, aaraştırmaların da dooru hem uygun metodologiya temeli var. Studentlär üüsek uurda bilgilerini hem aaraştırmak becermeklerini gösterdilär: bilim informaţiyasını eterli toplamışlar, işletmişlär, çıkışları yapmışlar. Pek önemni, ani magistrantlar çalışmışlar, ki işin praktikada faydası olsun, da universitet öncesi kurumnarda çalışan üüredicilär kullanabilsinnär bu enilikleri.
Devlet ekzamen komisiyası azaları metettilär disertaţiyaların zengin içindeliini, magistrantların aaraştırmak becerikliini: başarannar islää bilerlär seçili temada problemneri, bol-bol kullanıp kompyüter tehnikasını, prezentaţiya yapȇrlar, türlü görümnü materialları düzerlär, bilim diskusiyasına katılȇrlar da soruşlara argumentli cuvap vererlär.
Magisterlik disertaţiyalarını korumak geçti üüsek uurda, Devlet ekzamen komisiyası olgun speţialistleri gördü da ii notaları koydu. Zenginnedip kendi metodika ustalıını, başarannarın taa çoyu Gagauziyada uşak başçalarında hem şkolalarda ileri dooru taa efektiv hem taa büük havezlän çalışacek.
