Komrat Devlet Universitetinin Bilim bibliotekasında Milli kultura fakultetinin 0114.9 „Dillär hem literaturalar” spetsialitetindä, „Gagauz hem romın dili hem literaturası” üürenmäk programasında, GR-26 akademiya grupasında üürenän birinci kurs studentleri için tanışma dersi geçirildi.

Çalışma 2026 yılın 4 sentäbri günü universitetin „Pedagogika” kursu çerçevesindä, „Pedagogika bilimneri” profesiya hazırlığının genel uurunda geçirildi. Disciplinanın teoriya hem metodologiya temellerini benimsemää hem başlıca bilgi kaynaklarınnan tanışmaa yöneldilmiş dersi pedagogika bilimneri doktoru, universitet konferenţiarı Maria IANIOGLO geçirdi. Dersin başlıca neeti gelecektä pedagog olacak studentlerdä „Pedagogika” kursuna görä bibliografiya kaynaklarının çeşitliliyi, onnarın kullanılışı hem üürenmäk, bilim-araştırma hem profesiya çalışmasındaki önemi için annayış yaratmaktı.

Ders sırasında studentlär pedagogika bilgisinin başlıca kaynaklarınnan tanıştılar: ders kitapları hem üürenmäk yardımcıları, monografiyalar, bilim statyaları, bilim çalışmalarının toplumnarı, konferenţiya materialları, dissertatsiyalar hem avtoreferatlar, normativ dokumentlär, profil bilim jurnalları, elektron üürenmäk resursları hem universitet bibliotekasının bilim bazaları.

Görüşmenin başında baş bibliotekacı Anna CHIOSEA birinci kurs studentlerinä bibliotekanın çalışma programasını hem okuma salonunda izmet kurallarını açıkladı. O, bilim hem üürenmäk proţeslerini destekleyän bibliotekanın bilgi resursları — kitap fondu, periodika basımları hem tematika kolekţiyaları — için geniş bilgi verdi.

Bibliotekanın arama sistemasına ayrı dikkat verildi. Studentlär elektron kataloglan, alfabet kartoteka kataloglan hem sistematika kataloglan nasıl kullanmaa lääzım olduğunu üürendilär. Bibliotekacı hem dä KDU’nun ofiţial saytında Bilim bibliotekasının sayfasını gösterdi, onun strukturasını, içindeliyni hem universitetin Elektron bibliotekasında arama algoritmalarını kısaca açıkladı.

Bilim bibliotekası