Komrat Devlet Universitetinin zaametçileri hem studentleri „Zamanın kopmaz ipi: asırlar arası baalantı hem muzey mirası" adlı Halklararası bilim-praktika konferenţiyasında pay aldılar. Konferenţiya Milli Gagauz İstoriya-Etnografiya Muzeyi „Dmitriy Kara Çoban"ın kuruluşunun 60-cı yıldönümünä adandı.
Beşalma küüyündä bulunan Milli Muzey 1966-cı yılın sentäbri ayının 16-da açıldı hem gagauz halkının istoriyasına, kulturasına hem adetlerinä tamamiyle adanmış dünnädä ilk muzey oldu. Onun kurucusu — belli poet, resimci, rejisor hem skulptor Dmitriy Nikolaeviç Kara Çoban. Bugün muzey gagauz kultura mirasının korunması hem yayılması için unikal bir merkezdir. Bobasının işini sürdüren hem muzey adetlerinin koruyucusu onun kızı — Lüdmila Marin oldu.
Konferenţiyanın paycılarına selämnä sözlerinnän danıştılar:
- M. Semönova — Gagauziya avtonom-teritorial bölümünün Kultura Baş Upravleniyasının başı
- T. Zanet — akademik, yazıcı, dramaturg, folklorcu hem çevirici
- P. Vikol — Milli Etnografiya hem Tabiat İstoriyası Muzeyin direktoru (Kişinöv)
- L. Marin — Milli Gagauz İstoriya-Etnografiya Muzeyi „D. Kara Çoban"ın direktoru
Plenar toplantılarda Türkiye, Özbekistan, Azerbaycan, Moldova hem Gagauziyadan gelän öndäki muzeylerin direktorları kendi dokladlarını hem canlı prezentatiyalarını sundular.
Komrat Devlet Universitetini bu halklararası forumda istoriya doktoru, Milli Kultura fakultetinin Gagauz filologiyası hem istoriyası kafedrasının okutucusu Pyotr Mihayloviç Paşalı temsil etti.
O, „Gӧçmennerin kulturasından - TÜRKSOY kulturasına" temasında bilim dokladını sundu, bu da konferenţiya paycıları hem kolegaları arasında büük interes yarattı.
Bölä büük çapta ölçülerdä pay almak, KDU-nun regionun kultura-istoriya mirasını araştırmakta, korumakta hem halklararası arenada ilerletmektä önemli rolunu gösterer.
