22 oktäbri 2026-cı yılda Moldova Respublikasında ESTDEV tarafından finanse edilän milletlärarası ilerlemäk işbirlii proektlerin tesirini kıymetlendirmäk için online fokus-grupa görüşmesi geçti. Görüşmektä pay aldılar «İnnovaţion üüretim metodları yardımınnan Moldovanın evropalaşmasını kuvetlendirmäk» (BEst4ME) proektin paydaş universitetlerin temsilcileri, onnarın arasında proekt işlerinä katılan üüredicilär da. Proyektin neticelerini hem uzun vakıtlı tesirini kıymetlendirir Civitta kompaniyası.
BEst4ME proekti Estoniya milletlärarası ilerlemäk merkezi (ESTDEV) tarafından desteklendi, hem proektin işleri 2023-cü yılın iyün ayından 2024-cü yılın may ayınadak yapıldı. Proyekti Tartu universitetinin Johan Skytte adına Politika aaraştırmaları institutu (Estoniya), Moldova Respublikasında sa — Moldova Devlet Universiteti önetti.
«İnnovaţion üüretim metodları yardımınnan Moldovanın evropalaşmasını kuvetlendirmäk» (Best4ME) proekti nışannı innovaţion üüretim metodlarını evropa aaraştırmalarında hem üüsek üüretimin ţifralaşmasında pekletmää, hem da onnarı Moldova Devlet Universitetinin üüredici hem üürenici topluluunda, geniş planda sa — Moldovanın üüsek üüretim kurumlarında yaymaa.
Best4ME neeti oldu bilim aaraştırmaları görgüsünü hem eni üüretim metodlarını ilerletmää, yerli üüredicileri hem önetici başlıları çekmää, hem da studentlerä Moldovanın evropa integraţiyasına deyerli olan soţial reformaları yerine getirmektä cuvaplı kurumlarda (pravitelstvo kurumları, önetmäk strukturaları, NGO) gelecektä işlemää deyni lääzımnı uzmannık hünerlerini hem bilgilerini vermää. Görüşmektä pay aldı yuridik fakultetinin «Özel hukuk» kafedrasının konferenţiarı, hukuk bilimnerindä doktor habilitat Natalia Shchukina, angısı Komrat Devlet Universitetinin zaametçileri arasında Best4ME proektinin treninglerinä hem başka işlerinä katıldı hem proekt çerçeväsindä kazanılmış bilgileri universitet üüretim praktikasında kullanmak görgüsünnän paylaştı.
Lafetmäk sırasında görüşmäk paydaşları da paylaştılar proektä katılmak neticelerinnän, baktılar yapılmış işlerin aktual olmasına hem onnarın üüredicilerin uzmannık hünerlerini büütmesinä, üüretim programmalarını eniletmesinä hem innovaţion üüretim metodlarını sokmasına olan tesirinä. Ayırı dikkat verildi 2023-cü yılın avgust ayında geçen «AB aaraştırmaları için üüretim metodları hem innovaţion ţifra yanaşmaları» treninginin neticelerinä, hem da dissertaţiya aaraştırmalarını önetmäk hem üüretim prosesini taa ii etmäk soruşlarına.
Pay alannar hem lafettilär proektin üüredicilerä hem studentlerä olan tesirinin neticelerini, universitetlerdä kuruluşlardakı diişiklikleri, kazanılmış neticelerin uzun vakıt korunmasını hem edinilmiş görgüyü ileri dooru yaymak kolaylıklarını.
