Komrat Devlet Universitetı hem „Mihail Çakir” Kolecı arasında işbirlii annaşmasının gerçekleştirilmesi çerçevesindä, 3 Mart 2026-da pedagogika bilimneri doktoru, konferențiar universitar, KDU Milli Kultura Fakultetının dekanı Oksana Kurteva kolecın Pedagog Sovetının toplantısında attestatsiya komissiyasının teklif edilän azası olarak pay aldı.
Toplantıda 2026-cı yılda attestatsiyadan geçän üüredicilerin profesional çalışmalarının sonuçları incelendi. Üüredicilerin bir payı ikinci didaktika derecäsini almaa deyni attestatsiyadan geçti, başka üüredicilär dä gösterilän materialların sonuçlarına görä birinci didaktika derecäsini almaa deyni teklif edildilär.
Attestatsiya procedurası çerçevesindä üüredicilär kendi didaktika produktlarını gösterdilär. Bu produktlar onnarin toplanmış profesional denemesini hem üüredim procesinin organizațiyasında çaardaş yanaşmalarını yansıttı. Hazırlanmış materiallar ideya hem metodika originalınnan, praktika yönündän öneminnän hem kolecın üürenmä predmetlerinin okutulmasında doorudan kullanılmak kolaylıklarınnan ayırıldılar.
Özel dikkat didaktika hazırlamalarının aktual olmasına, üüredim neetlerinä uygunluuna, üüredicilär hem üürenicilär tarafından kullanılmasının kolaylıına, başarılı pedagogika praktikalarının ileridä yayılmak olanaklarına verildi. Gösterilän produktlar üüredicilerin üüretmäk içindekiliini iyileştirmää, çaardaş metodları hem instrumentleri kullanmaa, üürenicilerin düşünmäk hem poznama aktivliini yükseltmää çalıştıklarını gösterdi.
Attestatsiya komissiyasının azaları kolecın üüredicilerinin üüsek profesional ustalığını, metodika kompetențiyasını, yaratıcı yanaşmasını hem pedagogika işinä sorumnu davranmasını kaydettilär. Geçirilän attestatsiya üüredicilerin individual profesional denemesini umumileştirmää hem onnarin ileriki profesional gelişmä perspektivalarını belirlemää deyni önemli bir etap oldu.
Komrat Devlet Universitetının temsilcisinin Attestatsiya komissiyasının çalışmasına katılması iki üüredim kuruluşunun pedagog kadruların hazırlanması, metodika denemesinin paylaşılması hem üüredicilerin profesional gelişmesinin desteklenmesi uurundakı işbirliinin devamı oldu.
„Mihail Çakir” Kolecının administrațiyasına hem pedagog kolektivinä Pedagog Sovetının toplantısına katılmak için teklif, profesional dialoga açıklık hem konstruktiv işbirlii atmosferası için içtän şükür ederiz. Üüredicilerä ileridä dä başarılar, eni pedagogika ideyaları hem profesional başarılar dileriz!
Publikațiya: Kurteva O., doktor, konferențiar universitar
