14.08.2026 tarihinde Komrat Devlet Universitetindä rektorun „Rus dili hem literatura. 5-ci klas” eni dersliin avtorlarınnan buluşması oldu. Derslik iki payda „Liceum” basımevi tarafından basıldı.
Dersliin avtor kolektivi:
- Galina Drozd – doktor, universitet konferențiarı, çok yıl Komrat Devlet Universitetindä çalıştı;
- Oksana Kurteva – pedagogika bilimneri doktoru, universitet konferențiarı;
- Larisa Boykova – doktor, universitet konferențiarı.
Derslik Moldova Respublikasının Üüretim hem Aaraştırma Ministerlii tarafından açıklanan konkursa sunuldu hem konkursa görä enici oldu. Hazırlıın bütün gerekli etapları tamamlandıktan sora derslik „Liceum” basımevindä, baş redaktor bay İurii Mironun önderciliindä basıldı.
Dersliin hazırlanması dokuz ay sürdü. Bu dikkatli, cuvaplı hem yaratıcı bir proțes oldu. Bu iş avtorlardan üüsek profesional ustalık, dikkat hem uyumlu ortak çalışma istedi. Bu zaman içinde avtor kolektivi dersliin strukturası hem içindekilii üzerinde çalıştı, üüretim tekstlerini seçti, alıştırmaların hem çalışmaların sistemasını hazırladı. Ayırı olarak, materialların milli kurikulumun istemnerinä hem beşinci klas üürenicilerinin yaş özelliklerinä uygun olmasına önem verildi.
Buluşma sırasında rektor avtor kolektivini konkursta eniciliklän hem dersliin basılmasınnan kutladı. O, yapılan işin okul üüretim sistemasına önemini hem avtorların üüsek profesional kompetențiyasını nışannadı.
Rektor avtorlara gelecek yaratıcı hem profesional başarılar, eni inițiativaların gerçekleştirilmesini hem okulda üüretim proțesinin kalitesini hem sonuçluluunu yükseltmää yardım edecek zamana uygun üüretim produktlarının hazırlanmasını diledi.
Eni dersliin basılması Komrat Devlet Universitetinin üüredicilerinin hem akademika topluluunun temsilcilerinin bilim-metodika çalışmasının önemli bir sonucu oldu. Bu başarı onların üüretimin gelişmesinä hem okulların üüretim-metodika materiallarınnan saalanmasının ii edilmesinä katkısını gösterer.
