14 oktäbri 2026 yılda Komrat Devlet Universitetinin Ekonomika fakultetindä «Dış alış-veriş logistikası» disțiplinası üzä «Logistika faaliyeti için gümrük temini (gümrük düzenlemesi hem gümrük proceduraları)» temasına açık leksiya geçti.
Musafir lektor olarak Komrat kasabasının iç gümrük postu başı Malaçlı A. G. pay aldı, angısı studentlärlän gümrük düzenlemesi hem dış alış-veriş işinin kurulması uurunda zanaat bilgilerini hem praktika denemesini paylaştı.
Bu yortu Komrat Devlet Universitetinin Ekonomika kafedrası tarafınnan ekonomika, marketing, logistika, finanslar hem idarecilik uurunda gelecää zanaatçıların hazırlanmasında praktikaya dayanan yaklaşımın yerine getirilmesi çerçeväsendä kuruldu.
Açık leksiyada «Marketing hem logistika», «Biznes hem idarecilik», «Finanslar hem banklar» liţenţiat programalarının studentleri, hem dä «İş idarecilää» hem «Korporativ finansları» üürenmäk programalarının magistrantları pay aldılar.
Leksiya boyunca Moldova Republikasında gümrük düzenlemesinin aktual soruşları, gümrük proceduralarının uygulanmasının özellikleri, malların gümrük oformleniyası sırası hem dä halklararası yük taşımalarının praktika tarafları incelendi.
Ayırı dikkatı Malaçlı A. G. yüklerin gümrük oformleniyasında ortaya çıkan praktika hallerinä hem dış ekonomika faaliyetinin etgili hem kanonnu yapılmasında gümrük organnarının rolunä ayırdı.
Görüşmä açık dialog hem zanaatça lafetmäk havasında geçti. Studentlär hem magistrantlar gösterilän bilgiyä büük merak gösterdilär, aktiv soruşlar verdilär hem gümrük işinin praktika taraflarını konuşmakta pay aldılar.
Yortu bittiynän üürenicilär leksiyadan islää duygu kaldıklarını bildirdilär, onun doluluğunu, annadılmasının açık olmasını hem büük praktika önemini nışannadılar. Studentlär hem magistrantlar için ayırı paalılık gümrük bölümü başından doorudan cuapları almaa hem teorik bilgileri gerçek zanaat praktikasınnan karşılaştırmaa kolaylıı oldu.
Bölä işlerin yapılması üürenicilerin zanaat bakışını genişletmää, praktika kompetenţiyalarını kurmaa, üürenmäk kalitesini ükseltmää hem akademiyanın hem devlet kuruluşlarının arasında baalantıları kuvedetmää yardım eder.
Komrat Devlet Universitetinin Ekonomika kafedrası Komrat kasabasının iç gümrük postu başı Malaçlı A. G. candan şükürünü bildirir meraklı hem zenginnikli leksiya için, zanaat denemesini paylaşmaa hazır bulunduuna hem gelecää zanaatçıların hazırlanmasına koyduu paalı pay için.
İnanêrız ileri dooru berekettli işbirliinä hem eni ortak üürenmäk meropriyatiyaların yapılmasına!
