2026 yılın 22 oktyabrisindä Komrat Devlet Universitetinin ekonomika fakultetindä üürenicilerin Microinvest kompaniyasının temsilcilerinnän buluşması oldu. Buluşmak «Borrow Wisely!» («Akıllı borç al!») adlı milletlärarası finans bilgilerini ilerletmäk kampaniyasının çerçevesindä geçti.
Buluşmaya I ţiklin (lisenţiat) «Biznes hem administraţiya», «Marketing hem logistika», «Hesapçı işi», «Finans hem bankalar» speţialnostlarında üürenän studentlär hem II ţiklin (magistratura) «İşlerin administraţiyası», «Dallarda hesapçı işi hem audit» hem «Korporativ finans» programalarında üürenän studentlär katıldılar.
Buluşmak sıcak hem iş havasında geçti, studentleri, üüredicileri hem finans sektorunun temsilcilerini bireri topladı. Dekanın işlerini geçici getiren ekonomika bilimnerinin doktoru, universitet konferenţiarı С. С. Кураксина seläm sözü söyledi. O, gençlerin finans bilgilerini ilerletmää ne kadar önemni olduunu urguladı.
Musafirler studentlerä interaktiv bir prezentaţiya gösterdilär. İlkin finans bilgileri hem kredit almanın cuvapçılıı için laf gitti. Studentlär kendi bütçelerini idare etmäk için praktikalı nasaatlar aldılar hem kredit almadan ileri neyä dikat etmää lääzım olduunu üürendilär. Bu tema gelecektä finans hem hesapçılık işindä çalışacek studentlerä pek yakın geldi.
Sora kompaniyanın temsilcileri studentlär hem genç uzmanlar için Microinvesttaki kariyer imkännarı için annattılar. Kompaniyanın region filiallarında iş praktikasına ayırı dikat verildi. Orada aslı iş tecrübesi kazanmaa hem finans sektorunun işini içerdän görmää var nasıl. «Finans hem bankalar» hem «Korporativ finans» programalarında üürenän studentlär için bu, bilgilerini praktikada kullanmaa doorudan bir imkän. İdare, marketing hem hesapçılık dallarının gelecek uzmanları da şindiki bir finans organizaţiyasının işi nasıl kurulu olduunu üürenebildilär.
Studentlär aktiv soruştular, kendi fikirlerini paylaştılar hem diskusiyaya meraklan katıldılar.
Ekonomika fakulteti Microinvest kompaniyasına dolu hem faydalı buluşmak için şükür eder hem ileridä işbirliinä umut eder.
