2026-cı yılın Orak ayın 14–16 günnerindä Milli kultura fakultetının temsilcileri — Oksana Kurteva, doktor, konferențiar, hem Galina Mutaf, doktor, üüredici — şkola uchebniklarına eşitlik hem insan hakları standartlarını katmak için hazırlanêr olan „Kılavuz“ proektına adanmış konsultativ seminarlar seriyasına katıldılar.
Çalışmalar gibrid formatta geçirildi hem şkola uchebniklarının avtorlarını, değerlendirmecilerini, üüredicilik, insan hakları hem diskriminatsiyasızlık uurunda ekspertleri bir araya getirdi. Bu format geniş profesional işbirliini hem praktika denemesi paylaşmasını sağladı.
Konsultatsiyaların başlıca neeti oldu eşitlik, insan şannı, diskriminatsiyasızlık hem inklüziya prințiplerinä uygun şkola uchebniklarını hazırlamak için yanaşmaları danışmak. Uchebnikların hazırlanması hem değerlendirilmesi metodologiyasına girän „Diskriminatsiyasız karakter“ kriteriyinä hem milli kurikulumun taleplerinä özel dikkat verildi.
İlk çalışma günündä pay alannar diskriminatsiyasızlığın hem eşitliin konțeptual hem normativ temellerini inceledilär, uchebnik avtorlarının hem değerlendirmecilerinin görevlerini danıştılar. Ayrı bir tematika bloku uchebnik tekstlerindä, işlerinde hem resimnerindä engelli insanların doğru gösterilmesinä adandı.
Konsultatsiyaların ikinci günündä gender eşitlii, etnik hem dil grupalarının temsil edilmesi, din çeşitliliinin doğru açıklanması, yaş özellikleri hem kuşaklararası ilişkilär danışıldı. Pay alannar kullanılan hem hazırlanmakta olan uchebniklardan örnekleri analiz ettilär, olası stereotipleri belirledilär hem onnarı pedagogika hem dil bakımından esaslandırılmış biçimdä yeniden düşünmäk için yollar teklif ettilär.
Seminarların üçüncü günü barışı hem işbirliini ilerletmää, zorbalığı, bullingi hem nefret uyandırmasını önlemää, ayrıca saalıklı yaşam tarzını oluşturmaa adandı. Pay alannar artistik hem bilgi verici tekstlerin empatiyi, sorumnuluu, konfliktlerin barış yolunnan çözülmesini hem başka insanların haklarına saygıyı nasıl geliştirebileceeni danıştılar.
Praktika çalışmaları sırasında Oksana Kurteva hem Galina Mutaf şkola uchebniklarını hazırlamak hem analiz etmäk uurundakı denemelerini gösterdilär, eşitlik hem insan hakları standartlarını uchebnik tekstlerinin içindekiliinä, iş sisteminä hem resim materialına katmak olanaklarını danıştılar. Konsultatsiyalar sırasında Kılavuz proektını iyileştirmää deyni teklifler hazırlandı.
Konsultatsiyalar Moldova Respublikasının Üüredicilik hem Araştırma Ministerlii tarafından Eşitlik Soveti, Halk Advokatının Ofisi, Amnesty International Moldova, Moldovadakı ОБСЕ Misiyası hem BM İnsan Hakları Üüsek Komissarının İdaräsi ilän işbirliindä organizațiya edildi.
Publikațiya: Kurteva O.V., doktor, konferențiar
