Pedagogika hem Psihologiya kafedrasının bilim meropriyatiyalarının Planına hem Kulturalar arası terbi için Didaktik resurs merkezinin iş Planına görä, 23 oktäbri 2026 yılında Milli kultura fakultetindä «Kulturalar arası dialog: zorluklar hem perspektivalar» temasında praktikaya doorultulmuş bir seminar geçti. Seminar interaktiv formatta kuruldu, bilim-teoriya analizini praktik meselelerin çözülmesinnän birleştireräk.
Seminarda üüsek üüretimin ikinci ţiklindä üürenän, magistraturanın birinci hem ikinci kurslarından MNO-25 hem MNO-26 grupalarının studentleri pay aldılar.
Seminarın fasilitatorları Pedagogika hem Psihologiya kafedrasının üüredicileri oldular: M. A. Ianioglo, doktor, konferenţiar, hem L. S. Chior, doktor, konferenţiar. Onnarın önetimindä magistrantlar şindiki çok kulturalı dünnäänın zorluklarını hem üüretim hem bilim aaraştırmaları praktikasında peydalanan karşıtlıkların çözülmäk perspektivalarını derindän analiz edäbildilär.
Şindiki soţial-kulturalı şartlarda kulturalar arası anlaşmayı korumak, komunikaţiya proţeslerini derin profesional annamayı isteer. Buluşmakta başlıca dikkat kulturalar arası dünnäänın aktual zorluklarına hem onnarı konstruktiv yolla aşmak perspektivalarına verildi.
Seminarın işindä ayırı dikkat şu aspektlerä verildi:
Kultura anlayışı hem onun nışannarı.
Çok kulturalı dünnäänın zorlukları hem peydalanan karşıtlıkların çözülmäk perspektivaları.
Akademik ortamda barış kulturasını hem tolerant bilincini oluşturmanın teoriya-metodologiya temelleri.
Çok etnoslu üüretim ortamında başarılı profesional işbirliinin temeli olarak studentlerin kulturalar arası kompetentliinin geliştirilmesi.
Çok kulturalı, çok etnoslu bir üüretim ortamında türlü kulturalı tradiţiyaların üürenmäk proţesinä katılmasının gerçek örneklerini hem perspektivalarını gösterän keys-stadi örneklerinin analizi.
«Geçirilmiş seminar bizä yalnız şindiki çok kulturalı dünnäänın zorluklarını hem onnarın çözülmäk perspektivalarını derindän annamaa diil, ama dialogu kuvetlendirmää doorultulmuş bilim-pedagogika işlerimiz için açık doorultular belirlemää dä yardım etti», — meropriyatiyanın sonunda magistrantlar kaydettilär.
Buluşmanın sonucunu çıkararak, kurucular hem pay alannar bu türlü iniţiativaların pek aktual hem vakıdında olduklarını kaydettilär.
Pedagogika hem Psihologiya kafedrasının üüredicileri barış kulturasının hem milletlär arası ortaklıın gelişmesinä yardım edän bilim-praktika meropriyatiyalarının sırasını sürdürmää plannêêrlar.
Teksti hazırladılar:
M. A. Ianioglo, doktor, konferenţiar
L. S. Chior, doktor, konferenţiar
