2026 yılın Oktyabri ayın 27-sindä Komrat Devlet Universitetindä, TEKWILL salonunda, „Media okuryazarlığı çağdaş üüredicinin profesional kompetențiyası olarak: informațiya kullanıcısından mentora” temasında halklararası katılmaklan studentların yuvarlak masa toplantısı geçirildi. Etkinniik Milli Kultura Fakulteti tarafından karma formatta (yüz-yüzä hem online) hazırlandı. Toplantıya studentlar hem üürediciler katıldılar.
Toplantıya online formatta Ukrainadan, İvan Ogienko adına Kamenets-Podolskiy Milli Universitetinin pedagogika spetsialnostlarında okuyannar studentları da katıldılar. İki universitetin studentlarının bilim hem üüretim etkinniiklerindä birerdä katılması artık ii bir tradițiyaya döndü. Bu tradițiya halklararası akademik işbirliinin ilerlemesinä, profesional dialoga hem pedagogika tecrübesinin paylaşılmasına yardım eder.
Yuvarlak masanın amacı çağdaş üüredicinin profesional hazırlanmasında media okuryazarlığının rolünü konuşmak, gelecekteki üüredicilerin kritik düşünmesini ilerletmäk, hem da üürenicilerdä media okuryazarlığını hem digital güvenniini oluşturmak için praktika metodlarınnan tanıştırmaktı.
Katılımcıların dikkat merkezindä çağdaş üüretimin aktual soruşları vardı: digital ortamda informațiyanın dooruluu, yanlış informațiyanın hem manipulațiyaların tanınması, yapay intelektin kullanılmasında eni kolaylıklar hem risklar, uşakların digital güvennii, digital vatandaşlık temellerinin oluşturulması hem başlangıç klasların üürenicilerindä kritik düşünmenin geliştirilmesi.
Etkinniin bir özelliklerinden biri studentların prezentatsiyalarının interaktiv görevlerlän, trening elementlerinnän hem profesional diskussiyalarlan birleştirilmesiydi. Katılımcılar problemalı situațiyaları analiz ettilär, informațiyanın dooruluunu kontrol etmää yollarını konuştular hem üüredicinin uşaklarda digital ortama karşı sorumlu davranış oluşturmasındaki rolü hakkında fikirlerini paylaştılar.
Ayırı dikkat üüredicinin digital üüretim resurslarını hem generativ yapay intelekti kullanarkana profesional sorumluluuna, digital etikaya uyulmasına, personal bilgilerin korunmasına hem güvenni informațiya-üüretim ortamının kurulmasına verildi.
Diskussiyalar sırasında katılımcılar şu sonuca vardılar: çağdaş üüredici gelişmiş media okuryazarlığı kompetențiyalarına saap olmalı hem mentor rolünü yapmalı. O, uşaklara informațiyaya kritik yaklaşmaa, onun dooruluunu değerlendirmää, kendi fikirlerini argumentlemää hem digital tehnologiyaları sorumlu kullanmaa üüretmeli.
Yuvarlak masa anlamlı profesional dialog, halklararası student işbirlii hem pedagogika fikirlerinin paylaşılması için bir platforma oldu. İnteraktiv format studentların üüretimin aktual problemalarını konuşmasına aktiv katılmasını hem toplumun digital dönüşmesi koşullarında kendi gelecekteki profesional rolünü annamasını kolaylaştırdı.
Etkinniin moderatorları: Kurteva O.V., doktor, universitet konferențiarı; Polevaya-Sekeryanu A.G., doktor, universitet konferențiarı; İvarlak İ.F., asistent.
Böle etkinniiklerin geçirilmesi gelecekteki üüredicilerin profesional kompetențiyalarının geliştirilmesinä, kritik düşünmä kulturasının oluşturulmasına hem Komrat Devlet Universitetinin dış partnerlärlän akademik baalantılarının pekiştirilmesinä yardım eder.
Publikațiya: Kurteva O.V., doktor, universitet konferențiarı,
Milli Kultura Fakultetinin dekanı











