Komrat Devlet Universitetinin Milli Kültura Fakültetinin öğreticileri 2026–2027 yılları için gagauz dilinin ögrenilmesi hem ilerletilmesi üzre Milli Aksiyon Planının prezentatsiyasında pay aldılar. Bu dokument devlet seviyesinde hazırlanmış olup gagauz dilini bütün ögrenim basamaklarında – erken uşaklık terbiyesinden universitet seviyesine kadar, hem da yetişkinner için programalarda – sistemli desteklemää yöneliktir.
Plan geniş bir önlemler kompleksini içerir: öğreticileri desteklemää hem onların profesyonel ustalığını yükseltmää, gagauz dilindä dijital ögrenim resurslarını geliştermää, çağdaş ögrenim materiallarını neşretmää, yetişkinner için dil kurslarını organizatsiya etmää, hem da gagauz dili hem literaturası üzre kurikulumu yenilemää, öğrencilerin kommunikativ becerilerini geliştermää üstündä aktsent yaparak.
Programanın gerçekleştirilmesi için Moldova Respublikasının Ögrenim hem Araştırma Ministerliği tarafından 2,2 milyon ley ayrılmıştır. Önümüzdeki iki yıl planın pratik olarak gerçekleştirilmesi dönemi olacak hem elde edilen sonuçlar gagauz dilinin gelişmesi hem ilerletilmesi için uzun vadeli milli strategiyanın temelini oluşturabilir.
Toplantı Gagauziya ATU Baş Ögrenim İdaresindä geçirildi. Ona Moldova Respublikasının Ögrenim hem Araştırma Ministerliinin, Gagauziyanın Baş Ögrenim İdaresinin, Komrat Devlet Universitetinin, M. V. Maruneviç adına Bilim-Araştırma Merkezinin, Mihail Çakir Kolejinin nümayendeleri, hem da avtonomiyanın şkolalarından hem erken terbiyä kuruluşlarından pedagoglar katıldılar.
