Komrat Devlet Universitetindä Üüredici Gününä adanmış yortu meropriyati geçti. Yortu bir araya getirdi universitetin üüredicilerini, izmetçilerini, önderliini hem studentlerini da sıcak bir şükür bildirmesi oldu onnar için, kim gündän-günä bilgilerini paylașêr, gençlerä profesional oluşmak yolunda yardımcı olêr hem gelecektäki profesiyalarında ilk inanışlı adımlarını yapmaa yardım edär.
Yortunun simbolik adı oldu «Dünyayı açan insannar». Bu ideya bütün programanın maana temelini oluşturdu: üüredici gösterildi sade profesional bilgilerin taşıyıcısı olarak diil, ama mentor, araştırmacı, ilham verän, destekleyän, studentleri serbest düşünmää hem kendi seçimneri için cuvapçılık taşımaa üüredän insan olarak da.
Meropriyataa ayrı bir atmosferayı studentlerin kendileri verdilär. Yortu multimedia prologunnan başladı. Onda kısa, ama candan fikirler seslendi o üürediciler için, angıları kendi studentlerinin yaşamasında derin iz brakêrlar.
Universitetin üüredicilerini hem izmetçilerini kutlama sözlerinnän Komrat Devlet Universitetinin rektoru, doktor, konferențiar Sergey Konstantinoviç Zahariya seslendi.
Yortu programası çeşitli hem dinamik oldu. Onda organik birleşti muzıka hem dans nomerleri, şiirli kutlamalar, şakalı momentlar hem interaktiv çalışmalar. Seyirciler gördülär Yensun Lils kolektivinin dans gösterisini, studentlerin şiirli kutlamalarını, Sofiya Paçi tarafından gagauz dilindä seslendirilen «Üüredici» muzıka kompozitsiyasını, Aleksandr Angelov, Viktoriya Bezık hem Liya Tkaç tarafından seslendirilen türküleri, Olesya Toporun çıkışını, hem da Robert Arjintin klarnettän instrumental solo gösterisini.
Büük interes uyandırdı «Fotoya görä üürediciyi tanıyın. Rektor için ekzamen» nomeri. Onda universitet üüredicilerini uşaklık fotolarına görä tanımaa teklif edildi. Bundan eksik parlak olmadı şakalı «Üüredici dilindän tercümä» bölümü da. O universitet yaşamasından her studentä hem üürediciyä tanıdık sözlerä hem durumlara temelendi. Yımışak şaka bir kerä taa gösterdi universitet auditoriyasında kurulan karşılıklı annamak özel atmosferasını.
Yortunun sıcak hem duygulu momentlarından biri üüredicilerä şükür sözlerinä adanmış bölüm oldu. Bu sözler meropriyatin baş ideyasını özellikle açık gösterdi: gerçek bir pedagogun etkisi çok kerä auditoriya sınırlarından çok uzaa gidär.
Yortu çerçevesindä Komrat Devlet Universitetinin üüredicilerini ödüllendirmä ceremoniyası da oldu. Onnarın profesionalizması, çok yıllık işi, profesiyaya sadıklıı hem universitetin ilerlemesinä katkısı hak ettikleri saygıyı buldu. Bu üürenmä yılında Moldova Respublikasının Üürenmäk hem Araştırmalar Ministerliinin Gramotasıylan üürenmäk sistemasına katkıları için L.V. Fedotova, doktor, konferențiar, hem L.V. Boykova, doktor, konferențiar ödüllendirildilär.
Yortunun final bölümü lektsiyadan sora ne kaldıı üzerinä düşünmeyä adandı. Sade konspekt, prezentatsiya yada formula diil, ama en başta - aramaa, kontrol etmää, tartışmaa, soru sormaa hem kendi başına annamaa gelmää isteyişi. Sonunda şükür sözleri hem saalık, profesional ilham, interesli sorular, meraklı studentler hem mezunnarın başarılarından kıvanç dilekleri seslendi.
Bütün katılımcılara gözäl gösterileri için şükür ederiz. Ayırıca Milli Kultura Fakultetinin dekanı O.V. Kurtevaya yortu stsenariyasını hazırlamaa hem meropriyatı organize etmää için şükürümüzü bildireriz. Muzıka nomerlerini hazırladıkları için Kultura hem Art kafedrasının kolektivinä, T.I. Şçegoleva, Moldova Respublikasının Maestru în Artă simasında, ayrıca şükür ederiz.
Yortunun prezentatorlarına - Student Sovetinin studentlerinä Aleksandru Karp (EBU-25 grupası) hem Andrey Alekseev (Ю-25 grupası) - meropriyatı interaktiv biçimdä götürdükleri hem sıcak atmosferayı yarattıkları için ayrı şükür sözlerimizi bildireriz.
Üüredici Gününüz kutlu olsun, saygılı üürediciler!
Bilgiläriniz, saburluunuz, akıllılıınız, desteiniz hem her studentin hem bütün universitetin geleceenä yaptıınız katkı için sizä şükür ederiz!
