Derin acıylan bildireriz, ani Komrat Devlet Universitetinin filologiya bilimneri doktoru, konferenţiar universitar Ivanna Dmitrievna Bankova (04.02.1954 — 12.02.2026) geçindi.
Ivanna Dmitrievna Dezgincä küüyündä duudu. Ana küüyündä şkolayı bitirdiktän sora üürenmesini Kagul Pedagogika Kolejindä, sora da Kişinevdakı Moldova Devlet Universitetindä ilerletti. 2002-nci yılda Moskvadakı Dilbilim Institutunda doktorluk disertaţiyasını koruyup, gagauz dilinin gelişmesindä çok izmet etti.
1979–1986 yıllarında Dezgincedä rus dili hem literatura urokları verdi. 1986–1998 yıllarında hep ana küüyündä gagauz dilini hem literaturayı urokları vermää çeketti, üürenicilerinä ana dilinä sevgiyi hem halkın kultura mirasına saygıyı aşıladı.
1998-inci yıldan beeri onun profesional yolu Komrat Devlet Universitetinnän baalı oldu. 2002-2006 yıllarında Gagauz filologiyası kafedrasının başı oldu. 2006-2012 yıllarında rektor yardımcısı görevindä çalıştı.
Ivanna Dmitrievna — çok sayıda bilim artikollarının, sözlüklerin, gagauz dili metodika materiallarının, tabliţalar toplumunun, monografiyanın hem başka bilim işlerinin avtoru hem ortak avtorudur. Onun aaraştırmaları gagauz dilinin üürenilmesi hem yaşadılması için önemni temel oldu.
Onun aydın hatırası kolegalarının, studentlerinin hem onu tanıyan herkezin üreklerindä yaşaycek.
Komrat Devlet Universitetinin zaametçileri aylesinä hem yakınnarına baş saalıı dileer.
