2026 yılı 2 aprildä Milli Kültura Fakültetindä geçti praktika yönümlü seminar „Bilimdä ilk adımnar: nicä yazmaa bilim makalesini”, angısı I hem II cikl studentları için düzenlendi. Bu seminar studentların bilim hem araştırma kulturasına ilk adım atması, akademik yazının temel prensipleriyle tanışması hem bilim tekstini yazmaa hazırlıını güçlendirmesi için geçirildi. Seminarda bakıldı en önemli soruşlara, angılar baalıdır bilim makalesinin özelliinä, onun yapısına, materialın mantıklı kurulmasına hem akademik yazıya koyulan şartlara. Katılımcılar bilim makalesinin başlıca bölümlärini incelämää, araştırmanın profesional hazırlanmadakı rolünü anlamayaa hem akademik yazıda açık, mantıklı hem delilli fikirlendirmänin önemini kavramayaa imkan buldular.
Seminar programasında bilgi sunumu, interaktiv diskussiyalar, praktika alıştırmaları „Makaleyi topla” hem „Protsesä katılêrız: makalenin temel elementleri”, mini-test, refleksiya hem sertifikatların verilmesi vardı. Ayrı bir dikkat seminarın praktika tarafına verildi. Bu, katılımcılara sade teorik bilgi almaa diil, ama aynı zamanda bilim tekstinin kurulmasının belli etaplarını kendi başlarına denemää da imkan verdi. Seminarın özel deeri onun praktika yönümlü olmasından geldi. Studentlar sade akademik yazının teorik temelleriyle tanışmadılar, ama aynı zamanda ilk araştırma becerilerini geliştirmää, bilim materialını analiz etmää hem sistemaya koymaa, kendi akademik tekstlerini hazırlamaa yöneltilmiş işlärdä aktif katıldılar.
Böle etkinliklerin geçirilmesi studentların bilim kulturasını geliştirmää, onların araştırma işinä ilgisini hem motivatsiyasını artırmaa, konferentsiyalara, bilim proektlarına hem yayın işlerinä katılmaa hazırlıını oluşturmada çok önemlidir. Bu türlü initsiativalar universitet hazırlıı ile bugünkü akademik ortamın istekleri arasındakı bağı da kuvvetlendirär.
Seminarı hazırladılar hem götürdülär Curteva Oxana, doktor, konferentsiar, hem Polevaia- Secăreanu Angela, doktor, konferentsiar. Bütün katılımcılara gösterdikleri ilgi, aktiv katılımı hem bilim araştırması alanında emin hem anlamlı ilk adımları atmaa istekläri için içten teşekkür ederiz!
