Kasım ayının 13-ündä, 2024 yılında Komrat Devlet Universitetinin (KDU) administrativ binasının I. katında (adres: Moldova Respublikası, Komrat, Galațana Sokak, 17) insan haklarına adanmış #narativ patret hem resim sergisi açıldı. Sergi, her yıl düzennenän Tulip Press Awards yarışmasında son yıllarda hazırlanan materyalların (patret hem resim) yardımınnan insan haklarının türlü taraflarını gösterer. Sergi, Moldova Respublikası Hollanda Krallıı Büükelçilii, Baamsız Gazetacılık Merkezi (CJI), Piko Creative Ajansı hem Komrat Devlet Universiteti (KDU) iş birliinnän düzennendi.
Serginin açılışında KDU Rektoru, Doç. Dr. Serghei Zaharia, Komrat Kasabası Başkanı Serghei Anastasov, Moldova Respublikası Hollanda Krallıı Büükelçisi Saygılı Fred Duijn hem CJI Müdürü Nadine Gogu açılış konuşmalarını yaptılar.
Çalışmalar, insan haklarının çeşitli taraflarını gösterän beş kategoriyada sergilener: çocuk hakları, kız hem karı hakları, çeşitlilik hem inklüziya, Nistruyanı insan hakları hem saalıklı çevrä hakkı. Her kategoriyada bu hakların nasıl korunmadıını hem nasıl çözüldüünü gösterän annatmalar var. Bu sergi açıldı çeşitli insan haklarının korunmaması hem bu problemalara karşı güçsüz olan gruplar ya da topluluklar için bilgilik yaratmaa deyni. Sergi, gençleri bilgilendirmää hem düşündürmää deyni bir alan yaratêr.
#narativ sergisinin açılışının ardından Moldovada medya üüretimi, insan haklarına saygı gazetacılıın rolü, yaratıcı düşünmäk hem eni online Gagauz dili sözlüünün kurulması konularında üürenicilärlän diskusiya yapıldı. Bu diskusiyada pay aldılar NewsMaker gazetacısı Daria Slobodcicova, medya üüretimi uzmanı Natalia Grîu, “Gagauz.Online” proje koordinatoru Chiril Jelezov; moderator Hollanda Krallıı Büükelçilii temsilcisi Elena Cristian.
Sergiyi var nicä olacak siiretmää Komrat Devlet Universiteti administrativ binasının I. katında Dekabrinin 4-ünä kadar. Herbir patret hem resimin kısa içerii var, bütün annatmayı okumaa deyni sä lääzım kulanmaa QR kodu.
